Ma sobra usa ka gatos ka tawo an naka tagamtam han “Balik Probinsiya Part 2” nga programa han gobyerno ha magka lainlain nga bungto ngan siyudad ha probinsiya han Leyte.
Ini an gin sumat ni Vivian Claros an Provincial Social Welfare and Development Officer han probinsiya han Leyte ha interview han isumat.com
An siyahan nga grupo han mga benificiaries in umabot hadton Mayo 21, 2021 nga mayda 56 ka tawo ngan an ika duha nga grupo in umabot hadton Hunyo 4, 2021 nga mayda liwat 49 ka tawo or suma total nga 105 ka tawo ngatanan.
Hadton pebrero pa unta ipapatuman an ika duha nga hugna han “Balik Probinsiya” pero mahitungod han hangyo han mga opisyales han mga bungto nga makarawat han mga mag babalik probinsiya nga ig ugsod la anay mahitungod han pag damo han mga kaso han covid virus hinungdan nga na dalatar an pag patuman han programa.
Ngatanan nga nag balik probinsiya in negatibo han covid 19 virus san-o ini hira gin pasakay hin eroplano tikang ha Metro Manila tipakadto han ira tagsa tagsa nga mga destinasyon ha probinsiya han Leyte sumala pa kan Claros.
An kada pamilya in tatagan hin 10,000 pesos kada bulan ha sakob hin napulo ka bulan para pag plite han ira uukyan samtang ngan gin tagan pa hira hin kuarta nga gagamiton para han mga gastos han ira pag uli ngan an pamalit han mga gamit nga ira kinahanglan haira pag abot haira mga tagsa tagsa nga mga lugar.
Ha pakig himangraw han isumat.com kan Mayor Lovell Anne Yu han bungto han Alangalang Leyte kon diin gin dumara an seremonya han opisyal nga pag karawat han nag balik probinsiya haira bungto, naka karawat hin 31,000 pesos an usa nga mag asawa ngan 32,000 pesos naman para han usa nga pamilya nga mayda lima nga miemro. Ini in labot la han tag 10,000 pesos nga ig hahatag haira kada bulan ha sakob hin napulo ka bulan para han ira pag ukoy.
An mga beniciaries in bubuligan gihapon han TESDA nga makag aram hin Technical or vocational nga kurso nga pwede nira magamit haira pag pakabuhi haira pag uli ha probinsiya.
Labot la Han TESDA damo pa nga mga ahensiya han gobyerno an mabulig haira upod na an mga local government units agud magkaada ini hira hin maupay nga mga pakabuhi pakabuhi.
An mga interesado hini nga programa in pwede maki pag sumpayan ha opisina han National Housing Authority ngan han ira tagsa tagsa nga mga munisipyo ngan siyudad ngan sugad man ha opisina han DSWD para han mga impormasyon han pag apply han mao nga programa.
An “Balik Probinsya” in na nunuyo nga maibanan an kadamo han mga tawo nga nagungukoy ha Metro Manila tikang ha magka lainlain nga probinsiya labi na adton mga nagkukuri han ira panginabuhi nga gin eengganyo nga umuli nala haira probinsiya ngan bubuligan nga matagan hin maupay nga panginabuhi hiton gobyerno.
An mga benificiaries in gin pa pirma hin ka suratan nga deri na hira mabalik ha Manila haira paka tagamtam han mao nga programa.
