Isumat.com/8:33AM, June 10, 2020
15 Milyones pesos nga kantidad hin relief goods an na-ipanhatag han Department Of Social Welfare and Development (DSWD) han mga mulopyo ha Eastern Samar nga apektado ni Bagyo Ambo.
Hadin nag-agi nga adlaw, an mga personales han buhatan upod han kasugbong nira nga mga ahensya an natapos han pagdistribuer han hinabang ha bungto han Jipapad. Ini an katapusan nga munisipalidad ha Eastern Samar nga natagan nira han ayuda.
Ha kabug-usan 15,277,892 pesos an balor han relief goods para han probinsya nga ginlalakipan hin 28 mil nga family food packs, usa ka yukot nga malong, ngan 169 nga taklap.
Subay han report han DSWD Field Office 8, an family food packs in ginkokomponer hin 6 kilos nga bugas, upat ka lata hin meat loaf, upat ka lata hin corned beef o sardinas, ngan unom ka sachet hin kape.
Didto ha Jipapad, nakahatag an DSWD hin 2,400 nga food packs. An relief operations dida han bungto an katapusan han operasyon kay nakumpleto na an iba nga bungto pagpahi-agom han ayuda.
Kasumpay hini, an DSWD in tim-os nga nagpapasalamat han mga ahensya ngan mga grupo nga bumulig hini nga aktibidad. Amo ini an Provincial Government han Eastern Samar, an mga LGUs, Philippine Army, Philippine Navy, Philippine Air Force, Philippine Coast Guard, Office of Civil Defense ug tanan nga personales han DSWD.
Pira na ka semana an nakalabay han pagdagmalan ni Ambo an mga bungto han San Policarpo, Arteche, Oras, Jipapad, Maslog, Dolores, Can-avid, Taft ngan Sulat didto han lalawigan. Ini nga mga bungto in iginpa-ilarum ha State of Calamity basi makagbukalas hin pondo an probinsya tikang han Calamity Fund agud makabulig han apektado nga mga Estehanon. # (KEVIN SIOSANA)
