Isumat.com/2:00PM, September 23, 2020
Kun panahon hin krisis, emergency ngan mga trahedya, an tawo nakakahimo hin mga butang nga kun huhuna-hunaon makuri o imposible mabuhat. Pero tungod han pagduso han naghihimaroydoy nga kahimtang, nahihimo han tawo nga pas-anon bis ano kamakuri an pag-ayat han iya kapasidad.
Ini an na-eksperyensyahan ni Mark Peter Roncales nga gin-ilob an kadelikaduhan han magbiyahe hiya tikang ha San Pedro Laguna tipakadto ha Oras, Eastern Samar kun diin napulo ka adlaw an iya pakigbisog kontra han mga peligro ha kakalsadahan samtang nagbibisiklita.
An 19-anyos nga ulitawo in lumakat ha ira balay ha Laguna, pumakadto ha Paranaque, ngan gumawas ha Metro Manila tikadto na ha Este. Iya ginbayaan an iya kag-anak ngan duha nga kabugtu-an basi maka-aro hin bulig ha Oras nga maka-uli gihapon ha probinsya an iya pamilya. Iya gihapon gintinguha nga maka-uli ha Oras basi manginano han iya 85-anyos nga lola.
Nagsumat hi Roncales nga hadton waray pa pandemya han Covid, nakakatalwas an ira pamilya ha Laguna han pan-adlaw-adlaw nga panginahanglan dara han pagkapakabuhi. Hiya ug an iya tatay in nagbabaligya hin taho, samtang an iya nanay in naglalabada.
Pito kamagburugto hira Peter ngan hiya an ikaduha tikang han gimamanghori. An iba nga iya kabugtu-an in mayda na kalugaringon pamilya, sanglit tulo nala hira kamagburugto nga nalungon ha ira kag-anak.
Han pagbunalan han Covid an Pilipinas, nawagtang an pakabuhi han magtala-amay ngan haros waray na gihapon nagpapalabada kan iya nanay. Basi makapangaon hira, naningkamot nala hira nga makakuha bisan ano nga produkto ha dagat. Nakakarawat gihapon an ira pamilya han 4 Mil pesos nga hinabang tikang han gobyerno.
Ha atubangan hini, nagtikakuri la an ira kahimtang ha Laguna ngan mayda mga adlaw nga haros deri hira makaka-on. Tobtob nga inabot an takna nga nakagdesisyon hiya pagbiyahe ha Eastern Samar ha paglaum nga maka-utnga hira tikang han paghikalumos han kakuri-an.
Hi Mark Peter in natawo ha Oras, pero han nagtutubo hiya bumalhin an ira pamilya ha Manila ha pagtoo nga may malamrag nga kabubwason didto. Bisan kun nag-ukoy na hira ha Manila, may mga tuig nga nabalik hi Mark Peter ha Oras basi pumasyada o magbakasyon.
Han iya paglakat tikang Laguna, an iya la dara in ID Card, 150 pesos, tulo nga tshirt, irimnon nga tubig, alcohol, ngan paglaum nga makaka-uli hiya ha Este nga talwas. Waray niya dara nga Travel Authority, medical certificate ngan barangay certification.
Dida han iya pagbisikleta, may mga tawo nga nalooy ha iya ngan gindulhan hiya hin pagkaon, guti-ay nga kwarta ngan tubig. Iya ginsurapo an pira ka beses nga makusog nga uran, kamaping-it han sirak han adlaw, an nagsisisirom nga mga kakalsadahan ngan pira ka beses nga igbusay hiya madisgrasya.
Adlaw gab-i an iya pagpidal ngan napupugos la hiya pagpahuway ngan pagkaturog bisan ha ligid la han kalsada kun deri na niya naa-antos an kamakapoy.
Iginkahibalag pa gud hiya hin duha ka tawo nga deri maupay an plano han iya pag-abot ha Sorsogon. Gintapo hiya han duha nga kalalakin-an nga nagpruweba pag-agaw han iya bisikleta. Maupay nala kay nakalisto hiya hin pagpidal tipahirayo pero narabnot ngan nakuha han mga kalalakin-an an iya bag nga may sulod nga bado, tubig ngan alcohol.
Nagproblema na liwat hiya pag-abot ha Matnog, Sorsogon kay deri man hiya papasakyon ha ferry boat tikadto ha Allen, Northern Samar kun waray niya dara nga mga dokumento. Naswertehan gihapon hiya kay mayda sundalo nga Waray-waray nga nagbulig ha iya. Ginpasakay hiya ha Army Truck upod an iya bisikleta ngan nakasakay hira han ferry boat.
Pag-abot ha Allen, nagbisikleta na liwat hiya ug ha iya paghinumdom, an iya katapusan nga pagkaturog ha dalan in didto dapit ha Catbalogan. Dida han Lunes han gab-i, umabot hiya ha Border Control Point han Eastern Samar nga namumutang ha bungto han Taft. Deri na hiya bastabasta la nga makakasulod kay duro ka istrikto an patakaran didto han probinsya.
Pero iya iginsaysay ha mga nagdudumara han check-point an iya pagkatawo ug an iya gin-agi-an nga sakripisyo. Ginbuligan hiya han mga Border Personnel ngan ginpakaon ngan gintawagan an LGU-Oras basi hiya kuha-on.
Ngan dida han aga han Martes, nakadangat hiya han iya tuna nga natawhan kun diin sakay na hiya han behekulo han LGU.
Hapagkayana, hi Mark Peter in nagpapa-ilarum pa han duha ka semana nga kwarentina ha Quarantine Facility han munisipalidad. Tobtob yana, waray niya gin-aabat nga mga sintomas han Covid. Ha deri maiha nga panahon, iya na igkaka-usa an iya lola ngan bugto didto ha Oras.
An bisikleta nga iya kapartner han makarimadima nga kalbaryo ha dalan in mayda na mga nagkaruruba nga parte. Nagsumat pa hiya nga deri pa impas an pagbayad han iya inutang nga bisikleta.
Naglalaum hi Mark Peter nga matatagan han gobyerno hin bulig an iya pamilya ha Laguna nga makabalik gihapon ha Eastern Samar kun diin darudako an ira pagtoo nga makakatindog an ira kinabuhi tikang han paghirusdak tungod han Covid-19. #
