Isumat.com/7:29AM, September 24, 2020

Haros kada oras iginpapahinumdom han mga otoridad nga likyan la anay han katawhan an bisan ano nga klase hin pagkatitirok tungod han peligro nga maglarab an Covid-19, pero klaro nga deri gud ini natutuman.

Dida han tigda nga paglobo han mga nagpositibo han virus ha Barugo, Leyte, gintotoohan nga an tradisyon han “Tapos” an nagin kawsa hini. Sumala hin katatapuran nga surok han impormasyon, mayda “Tapos” nga natabo ha Brgy Sta Rosa kun diin kadam-an nga katawhan an nagkatitirok.

Nagpahayag pa an surok han impormasyon nga mayda usa nga APOR (Authorized Person Outside Residence) an tumambong han katitirok nga nagpositibo han kagaw ug posible nakatapon hiya han iba nga iya iginka-urusa.

Kakulop, Setyembre 23, iginreport han DOH Regional Office nga 25 an bag-o nga mga kaso ha Barugo. Ini in lakip han 103 nga bag-o nga Positive Cases ha bug-os nga rehiyon.

Kasagaran han mga bag-o nga natapnan ha Barugo in taga Sta Rosa nga iginka-urusa han naha-una nga nagkatatapnan. Pira ka tawo gihapon ha Brgy Roosevelt an natapnan. Gintutudlok nga mayda residente ha Roosevelt nga tumambong han “Tapos” ha Sta Rosa, sanglit nakatapon gihapon hiya ha iba.

Dida han report han LGU-Barugo, 108 na katawo an nagpositibo han Covid ha ira bungto. Sobra 70 an Active Cases hapagkayana, ngan 29 an naka-recover.

Kasumpay hini, an LGU in nagbutang hin Task Force didto ha Sta Rosa basi bantayan an gi-os han katawhan ngan maseguro nga masusunod an mga health Protocols.

Hi Barugo Mayor Macel Avestruz in padayon an panawagan ha mga bungtuhanon nga magka-urusa ngan tim-os pagsundon an mga patakaran basi deri na magsibrang an kagaw. Igindig-on pa ni Avestruz nga waray angay pagbasulon hini nga kahimtang kundi an ira mga kalugaringon.

Samtang, igin-anunsyo naman han DOH nga 60 nga Covid Patients an nagpaka-reover kakulop, sanglit umabot na ha 3,690 (84%) an Recovery rate dida han 4,366 nga nagkatatapnan ha Region 8. Aada naman ha 635 an Active Cases hapagkayana. #