Isumat.com/8:46AM, December 14, 2020
Kun mayda anti-illegal drugs buy-bust operation, mayda liwat parehas hini nga operasyon an mga otoridad kontra han iligal nga pagkuha ngan pagbaligya han agarwood o lapnisan, ugaring la kay medyo nadimalas an duha nga kapulisan ngan nag-antos hin igo hin bala.
Natabo an insidente pasado alas 12 han udto, Disyembre 13, ha Brgy San Rafael, Taft, Eastern Samar. Ginkilala an mga nasamaran nga hira PCpl Jerome Ortega ngan Patrolman Bernardino Julius Magsambol Jr nga mga kaapi han RSOG Operating Unit han PNP. Naigo liwat hin bala an suspetsado nga hi Romeo Moscosa. Hira nga tulo an gindara ha hospital basi pagtambalon.
Naka-eskapo naman an duha pa nga suspetsado ginkilala nga hira Jury Jaradal ngan Alias Berting.
An grupo han kapulisan in nagdumara hin Anti-Illegal Logging Operation tungod han report nga panguha ngan pagbaligya han marahalon nga agarwood dida han lugar. Usa nga miembro han grupo an nagpakilala nga kostumer nga mapalit unta han igindederi nga produkto. Han pagkarawat han kwarta han mga iligalista, nag signal an pulis ha iya igkasi otoridad han pagdakop na unta, pero naka-abat hini an mga suspetsado.
Nanbunot hin armas an mga suspetsado ngan ginpabuthan an tipaharani nga kapulisan. Dida han balyu-ay han bala, naigo hi Ortega ha wala nga parte han hawak, samtang hi Magsambol naigo ha igbaw han tuhod. Nag-antos naman hin mga igo hin bala ha tiil ngan sugbong hi Moscosa.
An agarwood o lapnisan in matatad-an ha lawas hin dagko nga kakahuyan. Gin-uutod an kahoy basi la makuha ini nga agarwood. Ginhihimo ini nga insenso o mga pahamot hin mga hadi ngan rikuhanon nga katawhan labi na ha Middle East. #
