Isumat.com/Oktubre 1, 2021
Waray didto ha iya panimalay hi Retired Army Col Emil Zosa han igserbe han mga otoridad an Warrant of Arrest ha kaso nga Murder kontra ha iya.
Kakulop (Setyembre 30, 2021) an mga elemento han PNP-CIDG in pumakadto ha puy-anan ni Zosa ha Sta Margarita, Samar basi igserbe an arrest warrant nga iginpalusad han RTC-Branch 46 ha Tacloban City. Dida han dokumento, upod gihapon han iginpapa-aresto han korte ha parehas nga kaso in usa nga indibiduwal nga may ngaran Arturo Deborbon.
Subay han impormasyon, an korte in waray iginrekomandar nga piyansa para han temporaryo nga pakagawas ha karsel han mga akusado.
Tungod kay waray man didto hi Zosa, an iya bayaw nga hi Nathaliel Balios nga amo an nagmamangno han balay hadto nga takna, amo an ginpakarawat han kopya han nasabi nga papeles. An CIDG in nag-aro gihapon hi certipikasyon ha barangay komo pagpamatood nga iginserbe an Arrest Warrant didto han lugar han nasabi nga petsa ngan oras.
Ini nga kaso in nag-ugat han pagpataya kan Enrique Manas han Brgy Bahay, Sta Margarita pira na ka tuig an nakalabay. Igin-aalegar nga an “Deborbon Private Armed Group” an responsable han krimen. Duha han mga suspetsado, hira Joel Calagos ngan Reymart Antivo in nag-angkon nga kaapi hira han grupo nga nagpatay han biktima ug ira igin-alegar nga hi Zosa an nagsugo ha ira.
Tobtob han ginsusurat ini nga notisya, hi Zosa in waray pa kakontak han mga taga media ngan nagpapadayon nga hilom an iya kampo mahitungod hini nga isyu.
Pero, hanhadi han Setyembre 17, hi Zosa pinaagi hin post ha facebook in mahugot nga nagdiwara nga may kalabutan hiya han krimen ngan iya igindig-on nga pulitika an nagpapaluyo hini.
Hi Zosa in duha na ka beses nga dumalagan ka gubernador han Samar kontra han pamilya Tan ngan pirmi hiya napeperde.
Ginhuhurobhurob nga an mabangga yana ka gobernador han Samar kontra kan Gov. Reynolds Tan amo hi Sta Margarita Mayor Gemma Zosa nga asawa ni Emil. #
