Isumat.com/12:05PM, Marso 18, 2021
An makasaysayan nga pagtigaman han ika-500 nga anibersaryo han pagdu-ong han grupo ni Ferdinand Magellan ha Homonhon Island, Guiuan, Eastern Samar in ginkubit hin kabido-an han mamatay in usa nga SK Chairman ha aksidente ha kadalanan samtang nagbibiyahe tikadto unta han mga aktibidadis han selebrasyon.
Dida han impormasyon nga nahikay han Isumat.com, an biktima in ginkilala nga hi Christine Joy Abueme, SK Chairman han Brgy Cagusuan ha Homonhon Island.
Hi Abueme ug an iya duha nga kaupdanan in sakay hin motorsiklo ngan tikadto unta ha Brgy Casuguran kakulop, Marso 17, basi magtambong hin Santos nga Misa ngan iba pa nga aktibidad.
Samtang nagbibiyahe hira, nautod an kadena han motorsiklo ngan nawarayan kontrol an nagmamaneho han sarakyan hinungdan han aksidente. Hi Abueme in nag-antos hin grabe nga karamtan ha lawas ngan gintalinguha madara ha hospital didto ha Guiuan pero binawi-an hin kinabuhi.
An duha nga iya kaupdanan in nakasalbar han aksidente ngan padayon gintatambal ha hospital. #
