Isumat.com/8:39AM, Marso 18, 2021
Waray lugar ha amon bungto an iligal nga huygo ngan iba pa nga aktibidad nga talapas han balaud sumala kan Mayor Saturnino Medina Jr han Isabel, Leyte.
Hi Mayor Medina in nagpatapod nga deri makakag-operate ha Isabel an mga iligalista sugad han illegal numbers game, igindederi nga droga ngan iba pa nga aktibidad nga supak han balaud.
Nagpasarig an alkalde nga kun mayda magprupruweba pagdumara han iligal nga pagpahuygo ha iya bungto, ini in deri niya tutugutan nga matabo. Sering pa niya, waray malamrag nga kabubwason an mga tawo nga nadadabi hini nga tinuyaw nga buruhaton.
An Victoria Development and Ventures Corporation (VDVC) in personal nakighimangraw kan Medina ngan iginpatapod han alkalde an iya pagsuporta han operasyon han Small Town Lottery (STL) ha iya nasasakupan.
An VDVC amo an gintagan hin permiso ngan otorisasyon han PCSO nga magdumara han STL ha Leyte, Tacloban ngan Biliran. Amo la ini nga kompaniya an may kamanduan han Malakanyang ngan PCSO nga magkaada han STL Games han nasabi nga mga lugar.
Kun mayda man iba nga nagpapataya labi na kun swertres, pick 3 ngan pick 2, ini in mga iligal kay waray pagtugot ha operasyon han peryahan ng bayan.
An VDVC in nagbabayad hin buhis ngan mayda kabaraydan ha PCSO. Ini nga pondo an gingagamit han PCSO paghatag hin ayuda ngadto han mga kablasanon nga napakadto ha ira opisina.
An mga iligalista in deri nabayad hin buhis ngan waray bayad ha PCSO sanglit waray ini bulig ha katawhan, lugod an nagsasakmomo han salapi amo an nagpapadalagan hini.
Kasumpay hini, kadam-an nga mga mulopyo ha Isabel an nagpasalamat ha VDVC sugad man kan Medina kay nagkaada hira hin lehitimo nga pakabuhi pinaagi han pagin Sales Agent han VDVC para han STL Games.
Ha luyo nga bahin, na-obserbaran naman han VDVC nga nagpapabilin pa an illegal numbers game ha iba nga bungto han Leyte. An korporasyon in naglalaum nga an PNP in maghimo na hin epektibo nga pitad basi masurapo ngan mapoypoy an iligal nga pagpahuygo. #
