Isumat.com/7:38AM, September 9, 2020
Hinay-hinay nga naghitaas an recovery rate han mga pasyente han Covid-19 ha Eastern Visayas han nag-agi nga pira ka adlaw.
Duha na ka semana an nag-agi, nag-alos-os ha 60% an recovery rate han rehiyon pero hinay-hinay nga sumaka ini tungod han nagtitikadamo nga nakakatalwas tikang han impeksyon han kagaw. Bisan kun padayon an paghitaas han nagpopositibo, darudamo an nakakatalwas.
Kakulop, Septembre 9, an DOH Regional Office in nag-anunsyo han 137 nga bag-o nga naka-recover, sanglit aada na 2,560 an Total Recoveries. Ini in 73% han suma-total nga 3,505 nga Confirmed Cases han rehiyon.
Dida gihapon han report han DOH, nadugangan hin 64 nga Covid Patients an Sinirangan Bisayas kun diin an Calbayog City an nagrehistro hin 11 nga kaso ug ngatanan ini pinaagi hin Local Transmission. Umabot na ha 81 an mga natapnan han virus nga Calbayognon, 33 na an nakatalwas ngan 1 an namatay.
6 naman nga mga Close contacts an bag-o nga mga pasyente ha Catbalogan City, samtang an Pinabacdao mayda gihapon unom, Villareal-3, ngan Sta Rita-1. An bug-os nga probinsya han Samar in mayda na 1,244 nga nadarahigan han kagaw.
Sumaka naman ha 1,087 an mga natapnan ha Leyte katapos nga mahipatik an bag-o nga mga kaso ha masunod nga mga bungto: Palo-5, Babatngon-2, Tolosa-1, Burauen-2, Abuyog-1, Jaro-1, San Miguel-1, Matalom-1, Capoocan-1, Isabel-2, ngan Tabango-1.
An Tacloban City in mayda 9 nga bag-o nga Positive Cases. Dara hini, aada na 552 an Taclobanon nga natapnan kun diin porlomenos 200 na an naka-recover. An Active Cases dida han syudad in sobra 300 yana.
Upat an nadugang nga kaso ha Northern Samar; duha ha Eastern Samar; tulo ha Southern Leyte ngan usa ha Biliran. #
