Isumat.com/7:23AM, August 21, 2020
Ha kasaysayan han Covid-19 ha Sinirangan Bisayas, makokonsiderar nga natabo kakulop (Agosto 20) an grabe nga dagmal han kagaw ha rehiyon.
Ini in tungod kay nahipatik kakulop an gidadamu-i nga natapnan dida han kada adlaw nga report han DOH Regional Office. Nadugangan hin 97 nga kaso an rehiyon ngan kadam-an ha ira an mga Health Personnel ngan mga residente nga waray travel history.
Iginreport gihapon han LGU-Lawaan nga mayda nira mulopyo nga Covid Patient an tumalikod ha kadayunan kakulop han aga. Ini nga pasyente in usa nga babaye nga waray travel history ngan na-admit ha Divine Word Hospital kun diin nag positibo hiya han kagaw.
Iginpahayag han LGU nga kakulop mismo iginlubong an patay nga lawas ha Brgy Bulosao. Ini nga insidente in waray pa pormal nga pahayag an DOH kay ira pa gin-iimbestigar kun Covid-19 an hinungdan han kamatay. Ini an ika-napulo nga Covid Patient ha Region 8 nga binawi-an hin kinabuhi.
Dida han 97 nga natapnan kakulop, 53 ha ira an mga Catbaloganon. Lakip han mga bag-o nga nag positibo ha Catbalogan amo an ira alkalde nga hi Mayor Dexter Uy ngan 35 nga mga Health Workers. An iba naman in natapnan pinaagi han local transmission. Hapagkayana, maabot na hin porlomenos 50 nga Health Workers ha Catbalogan an nadarahigan han kagaw.
Napulo ka tawo an bag-o nga pasyente han Tacloban kun diin lima ha ira an mga Health Workers.
Ginbabantayan naman yana han LGU-Basey an duha ka tawo nga bag-o nga natapnan ha ira bungto. Ini in tungod kay waray hira travel history ngan deri taga Brgy Villa Aurora kun diin nagkaada na hin community transmission. Ini nga duha in taga Brgy Baybay nga namumutang ha poblacion han bungto.
Nagpahayag an LGU-Basey nga nagpa-dialysis an 58-anyos nga lalaki ha Divine Word Hospital ngan nag positibo hiya han virus didto han hospital ug natapnan an iya close contact.
Ngatanan mga LSI an mga bag-o nga kaso ha Javier, Palo, Merida, Dulag, Calubian ngan Matag-ob ha probinsya han Leyte. Mga LSI gihapon an lima nga bag-o nga pasyente ha Northern Samar.
Mayda naman mga local residents an nagkatatapnan ha Paranas, Zumarraga, Motiong, Jiabong, Pinabacdao ngan Villareal ha lalawigan han Samar.
Iginreport gihapon han DOH nga 47 an naka-recover kakulop sanglit umabot na ha 1,224 an nakatalwas tikang han virus. Ha kabug-usan 1,918 na an nagkatatapnan han kagaw ha Eastern Visayas.
Hapagkayana, 685 an Active Cases nga gintitimangno ha mga hospital ngan iba pa nga health care facilities. #
