Isumat.com/1:31PM, August 20, 2020
Tungod han waray hugpoy nga pagtikadamo han natatapnan han Covid-19 ha ira tagsa-tagsa nga lugar, naghimo hin mga pitad an LGU-Villareal ngan LGU Catbalogan City kontra hini.
Nagpalusad hin kamanduan hi Mayor Marilou Latorre nagpapa-ilarum ha Enhanced Community Quarantine o “Lockdown” an siyam nga barangay nga namumutang ha poblacion han bungto. Ini nga lockdown in gintikangan yana nga adlaw ngan mahagos hin usa ka bulan.
Subay han kamanduan, usa la ka tawo an puede makagawas ha kada panimalay basi pumalit han panguna nga panginahanglan ngan magpakabuhi. Waray gihapon tutugutan nga makagawas ngan makakasulod ngadto hini nga mga barangay labot la han otorisado nga mga personales ngan emegency nga sitwasyon.
An mga kapulisan sugad man tropa han Philippine Army an magbabantay dida han mga entry/exit points han lugar agud maseguro nga susundon ini han katawhan.
Sobra na hin 40 ka tawo an natapnan han Covid-19 dida han nasabi nga bungto ngan kadam-an han mga pasyente in waray mga travel history ngan deri man liwat Locally Stranded Individuals. Nagtotoo hi Latorre nga an mga LSI tikang ha iba nga parte han nasud nga waray makigsumpayan ha LGU an nagdara han virus ngadto han ira bungto.
Samtang, pira naman nga barangay ha Catbalogan City an iginpa-ilarum ha Enhanced Community Quarantine subay han Executive Order nga iginpalusad ni Mayor Dexter Uy. An mga lugar nga aada ha ECQ-Critical Zone amo an Mercedes, Canlapwas ngan Barangay 13; samtang igpapa-ilarum naman ha ECQ-Containment Zone an Maulong, Munoz, San Andres, San Pablo, Socorro, Guinsorongan, Bunu-anan, Guindapunan ngan Darahuway Daco.
Igpapasunod naman ha bug-os nga syudad an 24-oras nga curfew sugad man liquor ban.
Sobra na gihapon 90 katawo an natapnan ha Catbalogan nga ginlalakipan hin mga local residents ngan mga health workers.
Didto naman ha Eastern Samar, hi Mayor Jose Ivan Agda in nagmando hin tulo ka adlaw nga Hard Border Lockdown ha Borongan City. Gintikangan an implementasyon hini yana nga adlaw, Biernes, ngan mahagos tobtob han katutnga han kagab-ihon hiton Domingo.
Dida hini nga mga adlaw, magdudumara hin mahugot nga contact tracing an mga otoridad basi matudlok an mga tawo nga posible iginka-urusa han mga naha-una nga natapnan han virus. Mayda man gud Frontliner nga taga Borongan an nag positibo han virus ngan may mga lugar didto han syudad nga iya ginkadtu-an.
Gin-awhag ni Agda an mga Boronganon nga deri magkinagawas ha balay basi magin malinangpuson an contact tracing ngan deri na makapanapon an virus. #
