Isumat.com/8:27AM, August 15, 2020
Yana nga adlaw, Agosto 15, mandatory na an pagsul-ot han face shield ngan face mask han ngatanan nga pasaheros ngan drivers han pampubliko nga mga sarakyan, pero nagpahayag an Land Transportation Office nga deri la anay hira mandadakop han mga makakatalapas hini ha syahan nga pira ka adlaw han implementasyon han bag-o nga patakaran.
Hi LTO Region 8 Director Rhodelio Poliquit an nagpahayag nga yana nga adlaw, waray mandadakop nga taga LTO han deri magsusunod hini. Ginklaro niya nga an ira bubuhaton amo an pagpasarang han impormasyon o pagpasamwak ha publiko mahitungod hini nga kamanduan.
Ginklaro ni Poliquit nga damo pa nga katawhan an deri pa maaram hini nga patakaran, sanglit maghihimo la anay hin haluag nga information drive an LTO ngadto ha publiko. Igpapasabot nala han LTO ha maabot nga mga adlaw kun san-o hira magtitikang pandakop.
Subay han mando tikang ha LTO-Central Office an mga drivers an magsasakmomo han multa kun magpasakay hira hin pasaheros nga waray face mask ngan face shield.
Kadungan hini, an Philippine Coast Guard ha aton dapit in nagpahinumdom gihapon ha mga pasaheros han barko ngan pumpoats. Nagsering an Coast Guard nga kun mayda pasahero nga waray hini nga mga protective gears, deri nira pasasakyon dida han barko o pumpboat nga pampasahero.
Iginmando gihapon han Department of Labor nga ngatanan han mga magtatrabaho in dapat may face shield ngan face mask ha ira mga opisina o lugar han trabaho. #
