Isumat.com/9:01AM, August 14, 2020
Duha na nga pasyente han Covid-19 ha probinsya han Biliran an nagka-ada hin magka-iba nga resulta han swab test ngan ini nga mga insidente in nakagduso kan Governor Rogelio Espina nga magpahungaw han iya sentiemento mahitungod hini.
Hi Espina nga usa gihapon nga doktor, in nagpapaki-ana kun kay-ano nga sugad hini an mga resulta han swab test ngan nanawagan hiya ha DOH Regional Office nga magpagawas hin pagklaro kasumpay hini nga isyu kay nakakagupong ngan nakakabaraka ini ha katawhan.
An syahan nga insidente in natabo duha na ka bulan an nakalabay kun diin usa nga doktor nga taga Naval nga magpapa-opera ha Divine Word Hospital in nag positibo an swab test, pero pagbalhin niya ngadto hin usa nga hospital ha Cebu kataliwan hin duha ka adlaw, negatibo an resulta.
An ikaduha nga insidente in natabo yana nga semana kun diin an pasyente in taga Almeria. Positibo an resulta ha Divine Word Hospital pero han pagdumaraon an re-swab ha EVRMC katapos hin tulo ka adlaw, negatibo na an resulta.
An DOH in waray pa maghahatag hin kasayuran tungod hini nga isyu samtang ginsusurat ini nga notisya.
An probinsya han Biliran in mayda na 61 katawo nga nagpositibo han virus kun diin 38 an naka-recover, 22 an Active Cases yana ngan 1 an namatay.
Iginpahayag naman ni Naval Mayor Gerard Roger Espina nga gagamiton han LGU an Villa Caneja Housing Project komo Quarantine Facility. Magseserbe ini nga reserba nga facilidad ingkaso deri na maaakos han mga eskwelahan an pag-akomodar han nagkakabalik nga mga LSI ngadto han bungto. #
