Isumat.com/4:17AM, July 24, 2020
Nagtitikahabubo an recovery rate han mga pasyente han COVID-19 ha Eastern Visayas. Ini in dara han tigda nga paglobo han ihap han mga nagpositibo han virus labi na han nakalabay nga tulo ka adlaw.
Tikang ha 95% dida han Hulyo 20, nag-alos-os ha 85% an recovery rate tobtob kakulop ,Hulyo 23. Ini in dara han damo nga nahidugang nga kaso. Dida han Martes ngan Mierkules, 50 an nahidugang nga natapnan, samtang kakulop, Huebes, 32 katawo an bag-o nga nagpositibo han kagaw.
Ha kabug-usan 757 na an natapnan, 644 an naka-recover, 110 an active cases hapagkayana, ngan nagpapabilin nga tulo an pasyente nga namatay.
An 32 nga bag-o nga pasyente amo an masunod:
Lima nga Positive Cases an nakadagmal ha bungto han Merida, Leyte. Ini an syahan nga higayon nga nagkaada hin mga kaso dida han bungto. Ini nga mga pasyente in ngatanan kalalakin-an nga umabot ngadto han bungto hadton Hulyo 14 tikang Lapulapu City. Hira in mga asymptomatic ngan aadto ha Isolation Unit han LGU.
Nagtikadamo gihapon an pasyente ha Leyte, Leyte. Hadton una nga adlaw, unom an nahidugang nga kaso, ngan kakulop mayda nira upat nga kadugangan nga pasyente. Ini nga upat nga bag-o nga kaso in ngatanan LSI kun diin an tulo tikang ha Pasay City ug an usa in tikang ha Paranaque City.
Tagduha naman an bag-o nga natapnan ha Kananga ngan Mahaplag. Tikang ha Paranaque an duha nga bag-o nga kaso han Kananga. Hira in kalalakin-an nga umabot hadton Hulyo 15. Napulo na an nagpositibo ha Kananga kun diin 6 an active cases, tulo an naka-recover ngan usa an namatay. An duha nga kaso ha Mahaplag in mga LSI gihapon tikang ha Manila, 53 anyos nga babaye ngan 44 anyos nga lalaki.
An Tacloban City in nagkaada hin bag-o nga pasyente pinaagi hin 63 anyos nga lalaki; samtang an Dulag in mayda gihapon bag-o nga nagpositibo ngan hiya in 42-anyos nga OFW tikang ha Saudi Arabia; tikang gihapon ha Saudi an bag-o nga pasyente ha Isabel; samtang 37-anyos nga LSI tikang ha Makati an bag-o nga natapnan ha Baybay City.
Ha luyo nga bahin, upat an bag-o nga kaso ha Maasin City. An usa in 29-anyos nga OFW tikang ha Saudi, samtang an tulo nga iba in mga LSI tikang ha Manila. 12 na an nagpositibo ha Maasin kun diin walo na an nakatalwas ngan upat an active cases.
Duha nga pasyente an nahidugang ha Pintuyan. Hira in tikang ha Quezon City ngan Maniila ug magkasakay hin van nga umabot ngadto han bungto hadton Hulyo 14. Mga LSI gihapon an duha nga pasyente ha St Bernard nga umabot ngadto han munisipalidad hadton Hulyo 15 tikang ha Bulacan.
Ha probinsya han Samar, tulo nga kaso an nahidugang ha Paranas ug hira in mga LSI tikang ha Manila. Ha Tarangnan, duha an nagpositibo ngan tikang hira ha Navotas ngan Taguig City. Tikang naman ha Muntinlupa City an residente han Motiong nga natapnan han virus. Usa gihapon nga LSI an bag-o nga kaso ha Catbalogan City. Hiya in 25-anyos nga lalaki tikang ha Pasay City. Hapagkayana, tulo an active cases ha Catbalogan ngan 21 na an naka-recover. #
