Isumat.com/1:45PM, July 20, 2020
Pinusil ngan namatay kanina han aga hi Andres Cruz, 46 anyos ngan barangay kapitan han Sherwood, Albuera, Leyte.
Subay han inisyal nga imbestigasyon hi Cruz in katapos pala tumambong hin bista ha Regional Trial Court, Baybay City han pusilon hiya hin waray pa kakilal-i nga suspetsado samtang nagbabaktas hiya ha Magsaysay Avenue dida han nasabi nga syudad.
Kadagmitan nga umiskapo an suspetsado ngan ginhahalpat yana han mga otoridad.
Hi Cruz in naatubang hin kaso tungod han akusasyon nga iya pinusil ngan pinatay an residente han iya barangay nga hi Paulito Paton-og hadton Mayo 7, 2020.
Hi Paton-og in pumakadto ha balay han kapitan basi mag-aro hin sertipikasyon kasumpay han iya panuyo nga makatagamtam han Social Amelioration Program. Pero sugad-sugad nga nagkabalingkutay hira Paton-og ngan hi Cruz ug dida hini pinusil han kapitan hi Paton-og hin upat ka beses gamit in kalibre .45 nga pistola.
Hi Paton-og in nadara pa ha hospital pero binawi-an han kinabuhi.
Gin-iimbestigar pa han mga otoridad kun ini nga pagpataya kan Cruz in may kalabutan han kaso nga iya pagpatay kan Paton-og.
Hadton Oktubre 2016, hi Cruz in ginsampaan hin kaso kasumpay han iya paghilambigit han iligal nga operasyon han droga ni drug lord Kerwin Espinosa nga taga Albuera, Leyte gihapon. Waray na kasabuti kun ano an nahitabo hini nga kaso nga iginsalawad han Albuera PNP ha Ombudsman kontra han barangay chairman. #
