Isumat.com/8:20AM, July 8, 2020
Ginlaknit ha pwesto in usa nga opisyal han Municipal Police Office han Naval, Biliran. Ini in tungod han mga reklamo hin pira nga mulopyo nga abusado hiya samtang nagdudumara hin checkpoint.
Hi Mayor Gerard Espina han Naval in nagpasabot nga gin-relieve na an nasabi nga PNP official ha iya pwesto. Ini in subay han mando ni Biliran PNP Provincial Director Julius Coyme. An mga alegasyon han pag-abusar in gin-iimbestigar nayana han PNP.
Ginbabanabana nga matatapos an imbestigasyon hini nga reklamo kontra han pulis yana nga semana.
Hadin nag-agi nga pira ka adlaw, pira nga katawhan an nag-alegar hin deri maupay nga eksperiensya ha mga kamot han nadadabi nga opisyal. Ira igin-alegar nga bisan kun kumpleto an mga dukumento ngan Identification Cards, papakuri-an ka paglapos han checkpoint.
Mayda usa nga nagsumat nga bisan kun kumpleto an iya mga papeles, ginpapili daw hiya han opisyal kun igka-kwarentina hiya hin duha ka semana o magmumulta o magpu-push-up hin 20 ka beses.
Iya daw ginpili nga mag push nala hiya, pero deri tuhay an pag-ihap han opisyal ngan haros sobra na hin 50 nga push up an iya nahimo. Samtang segi an iya push-up, nagtitinawa an opisyal. Igindugang pa han tagreklamo nga hubog hadto nga takna ini nga pulis.
Iginpatapod han PNP nga magigin patas an ira ginhihimo nga imbestigasyon. #
