Isumat.com/12:13PM,July 02, 2020
Nagpahungaw han iya kabido hi Leyte Governor Mic Petilla tungod han iya tinatawag nga deri matadong nga presentasyon han DOH-Regional Office han tinood nga kahimtang han COVID-19 ha iya nasasakupan nga probinsya.
Dida han interview han “Straight to the Point” nga programa ha 99.1 iFM-RMN, klaro nga mayda pag-uba hi Petilla hini nga ginawi-an han DOH. Iya ini gintawag nga “irresponsible and reckless presentation.”
Ini nga insidente in natabo dida han pagbisita nira National Task Force Chief Carlito Galvez ngan DILG Secretary Eduardo Ano nganhi ha Region 8 kun diin ira pinannginano an sitwasyon han rehiyon. Dida han hiruhimangraw upod han Regional Task Force, an DOH in nagpakita kanda Galvez ngan Ano han sitwasyon ha Leyte nga nagkukulang na hin Isolation Facilities tungod han damo na hin duro nga COVID Patients, pahayag han gobernador.
Nagsering pa hiya nga an DOH in nagsumbong ngadto han National Task Force nga sobra na hin 200 an pasyente han Leyte ug naabot la hin 56 an bed capacity han Isolation Facilities. Sumala kan Petilla, deri ini tinood kay damo pa an bakante nga Isolation Units han mga LGU ngan bisan ngani an gin-andam nga facilidad ha Leyte Academic Center in waray pa kagagamit.
Igindugang pa han amay han laalawigan nga an mga COVID Positive ha Leyte in haros ngatanan Asymptomatic ngan damo na an naka-recover tikang han infection han virus.
Nagawas nga deri andam an Leyte han pag-akomodar han mga pasyente ngan deri ini tinood, sering ni Petilla. Akos han probinsya an mga pasyente ngan deri kulang an facilidadis. Hinungdan hini, nagtatahap an gobernador nga amo ini an nagin rason kun kay-ano nga iginbalik ha mas istrikto nga General Community Quarantine an Leyte tikang han Modified GCQ.
Tobtob han ginsusurat ini nga notisya, gintalinguha han Isumat.com nga makuha an panig han DOH pero waray pa hira kabatunan hini nga isyu. # (KEVIN SIOSANA)
