Isumat.com/4:12PM, June 28,2020
Mahugot nga pinanhimuwa han Philippine Army an mga akusasyon nga ginpasibay-an han militar an pamilya han namatay nga NPA leader dida hin enkwentro ha Palapag, Northern Samar han nakalabay nga semana.
Kun aton manunumduman, hi Zaldy Meraya ug usa nga iya batos, in namatay han makigpinusilay hira kontra han mga tropa han gobyerno nga nagseserbe hin warrant of arrest kan Meraya dara hin kaso nga attempted murder. Dida han balyu-ay hin bala, nag-antos hin kasamdan an asawa ni Meraya, an iya anak nga hi Jolina ug duha pa nga kabugtu-an. Hi Meraya an gin-aaligar nga finance officer han SubRegional Committee Arctic han NPA ha Northern Samar.
Kataliwan han insidente, pira nga progresibo nga grupo an nag-akusar han militar nga waray manginano han mga miembro han pamilya nga nagkasasamdan. Mayda pa lumutaw nga notisya nga grabe an kasamdan ni Jolina.
Ini nga mga alegasyon in igindiwara han militar. An 8th Infantry Division han Philippine Army in nagsaysay nga ira dayon gindara ha hospital an mga samaran basi katagan han kaangayan nga medical attention. Ginsayod pa han militar nga hababaw la nga mga kasamdan an gin-antos han pamilya ni Meraya. Puede ngani deri na ig-admit ha hospital, pero nag-insister an militar nga magpabilin ha hospital an mga samaran basi hul-os gud hira nga matambal.
Igindugang pa han 8th ID nga an gobyerno han Northern Samar in kadagmitan nagpadangat hin ayuda sugad hin kwarta ngan pagkaon. Ini nga hinabang in personal nga iginduhol nira Board Member Florence Batula ngan Arnel Orsua, an Brgy Kapitan han Bagacay kun diin natabo an enkwentro.
An mga opisyal han lalawigan in nagdayaw han malinangpuson nga operasyon han militar ngan sumala ha ira, dako ini nga kapi-angan ha rebelde nga kagi-usan kay hi Meraya an gintutudlok nga nangunguna nga extornionist o nagpipinanhadlukon ha mga kontraktor ngan negosyante basi maghatag hin salapi ha NPA. #
