Isumat.com/8:30AM,June 23, 2020
Mahugot an panawagan han DSWD-Regional Office 8 ha ngatanan nga pamilya nga magin alerto kontra han On-Line Sexual Eploitation of Children (OSEC).
Nagpahayag hi DSWD Regional Director Marie Angela Gopalan nga kinahanglan magin mabinantayanon kita, labi na yana nga may natatabo nga pandemya ug an mga kabataan in aadto la ha balay, ug dida hini nakakatyempo an mga magraot an plano basi makaghimo han On-Line Sexual Exploitation.
Iginbuyagyag han DSWD nga dida han syahan nga unom ka bulan yana nga tuig, duha na nga kaso an iginreport ha ira ahensya. An mga biktima in 13-anyos nga babayehay tikang ha Silago, Southern Leyte ug an usa naman in Taclobanon nga 17 anyos. Ini nga mga kaso an gin-iimbestigar na yana han NBI ngan PNP.
Nagsering hi Gopalan nga natatabo ini tungod kay an Internet in nagin kaparte na han kinabuhi han mga Pilipino, sanglit may mga tawo nga nasingabot han inosente nga mga kabataan. Bisan ngani mismo mga kag-anak in usahay kakuntsaba dida hini nga iligal nga buruhaton.
Kasumpay hini, ginsasagdunan han ahensya an mga kag-anak ug an publiko nga magin ikmat hini nga aktibidad ngan igpasabot dayon ha mga otoridad kun may na-oobserbaran nga sugad hini nga binuhatan. Ginsagdunan gihapon han DSWD an mga kag-anak nga limitaran an pagpagamit han internet han ira anak ngan maghunahuna hin iba nga aktibidad para han pamilya.
Pira pala ka semana an nakalabay, nagsumat an Department of Justice nga duro an paghitaas han kaso han OSEC denhi ha Pilipinas han igpatuman an lockdown. Tikang Marso 1 tobtob Mayo 31, umabot hin 279,000 an nahireport nga child abuse, upod na hini an On-Line Exploitation. Han una nga tuig ha parehas nga petsa, umabot la ini hin 76,000 nga reklamo. Ini in 264 porsyento nga paghitaas han kaso.
Ginbabasol han DOJ an mga telecommunications company ngan internet service providers dara kay waray nira pantang-gala an access ngadto han pornograpiya nga websites ngan on-line sites nga nakakagdurot han child exploitation.# (KEVIN SIOSANA)
