Isumat.com/4:00AM,June 23, 2020
Lomobo na ha 431 katawo an kumpirmado nga natapnan han COVID-19 ha Eastern Visayas ug haros 50 hini in mga nagtatrabaho ha hospital.
An DOH-Regional Office in nagreport kagab-i (Hunyo 22) hin kadugangan nga 35 nga bag-o nga Positive Cases ug 22 ha ira in mga health workers.
17 han mga bag-o nga natapnan in mga residente han Tacloban City. Napulo ha ira in nagtatrabaho ha Eastern Visayas Regional Medical Center ngan pito in mga personales han DOH Regional Office. Ngatanan hira in aadto ha mga Isolation Centers ug nagdudumara na yana hin contact tracing upod an ira tagsatagsa nga pamilya an mga otoridad. Ha kabug-usan, an Tacloban in mayda na 54 nga kaso.
Lima gihapon nga kaso an nahidugang ha Ormoc City. Nagsering an LGU-Ormoc nga naka-siolate na gihapon hira. Ha Ormoc, mayda na 55 katawo an nadarahigan han kagaw.
Duha naman ka tawo an nahidugang nga COVID Positive ha Dulag, Leyte, ug ngaduha hira medical worker. An usa in doktor ha DOH Regional Office ug an usa in nurse ha EVRMC. Hira in aadto ha Isolation Units ngan an ira tagsatagsa nga pamilya ha Brgy Candao ngan Brgy San Miguel in aada ha istrikto nga Home Quarantine ug nagdudumara gihapon hin contact tracing an LGU.
Usa gihapon nga health worker an natapnan nga residente han Tanauan, Leyte. Hiya in naka-assign ha DOH-Regional Surveillance Unit. An LGU-Tanauan in naghihimo hin contact tracing ug an pamilya han pasyente ha Brgy Buntay in naka Home Quarantine. Lima na katawo an natapnan han virus dida hini nga bungto.
An Palo, Leyte in nadugangan hin 3 nga kaso, samtang nahipatik ha Carigara, Leyte an ira syahan nga kaso. Waray pa maghatag hin detalye an duha nga LGU kasumpay hini nga mga pasyente samtang ginsusurat ini nga notisya.
An syudad han Borongan in nakagrehistro han syahan nga COVID-Positive. Ginklaro naman han City Government nga Boronganon ini nga pasyente pero maiha na nga nag-uukoy ha Tacloban kay nagtatrabaho man hiya ha EVRMC. Igindugang pa han report nga deri angay mabaraka an mga taga Borongan kay an katapusan nga pagkadto niya ha Borongan in didto pa han Hunyo 7 ug an iya exposure han COVID Positive in natabo Hunyo 9 denhi ha Tacloban, ngan waray na niya iginka-urusa nga taga Borongan.
Nahi-record gihapon an syahan nga kaso han corona virus ha Lavezares, Northern Samar. Pero ini nga pasyente in nagtatrabaho gihapon ha EVRMC. Naghihimo yana hin contact tracing kun mayda ba niya iginka-urusa nga iya mga kababayan.
Ha Basey, Samar may nadugang nga 3 nga kaso, samtang usa liwat an bag-o nga natapnan nga taga Catbalogan. 25 na katawo ngatanan an COVID Positive ha Basey, samtang 11 an sumatotal ha Catbalogan. Ini nga duha nga LGU in waray pa maghatag hin impormasyon kasumpay han mga bag-o nga Positive Cases.
Dida hini nga 431 nga kaso ha Sinirangan Bisayas, 39 pala an ginkonsiderar nga fully-recovered subay han latest update han DOH. # (KEVIN SIOSANA)
