Isumat.com/7:00AM,June 21,2020
May nahidugang nga 38 nga COVID-19 Positive Cases ha Eastern Visayas kakulop (Hunyo 20), samtang may kamanduan an DILG nga temporaryo deri pagawson ha Cebu an mga stranded nga katawhan.
An DOH Regional Office in duha ka beses nagpagawas hin mga resulta hin confirmatory tests kakulop. Dida han aga, 6 an positibo ngan pagkagab-i may kadugangan nga 32 nga natapnan han virus. Ini nga mga resulta in tikang ha Eastern Visayas Regional COVID Testing Center ngan Divine Word Hospital Testing Center. Dara hini, sumaka na ha 395 katawo ha Sinirangan Bisayas an kumpirmado nga nadarahigan han kagaw, kun diin 39 an naka-recover.
May kadugangan nga 11 nga Positive Cases an Tacloban City, sanglit umabot na ha 33 an sumatotal han natapnan denhi ha Tacloban. Tobtob han ginsusurat ini nga notisya, waray pa maghatag hin detalye an City Health Office kasumpay han bag-o nga nagpositibo han virus.
An Ormoc City in nadugangan hin 8 nga kaso. Subay han impormasyon tikang ha Ormoc-LGU, duha hini an mga OFWs ngan lima nga na-stranded tikang ha iba nga lugar. An ika-walo in taga Kananga, pero naka-admit ha usa nga hospital ha Ormoc salit nahilakip han ihap. Ha kabug-usan, mayda na 49 Positive Cases ha Ormoc.
Tulo naman nga bag-o nga pasyente an nahidugang ha Palo, Leyte. An usa in OFW ug an usa in na-stranded nga tikang ha Manila, pero waray pa maghatag hin detalye an LGU kasumpay han ika-tulo nga kaso. An Palo in mayda na 6 nga kumpirmado nga nagpositibo.
Ha syahan nga higayon, nahi-upod na dida han lista han mga lugar nga may positibo han virus an Palompon, Leyte. Kakulop 3 nga kaso an nahipatik ha ira bungto. Mga na-stranded ini nga mulopyo han bungto nga umuli tikang ha Cebu ngan Osamis.
An bungto han Dulag in mayda usa nga bag-o nga pasyente ug hiya in 12-anyos nga bata nga anak hin nagpositibo nga health worker ha EVRMC. Duha naman nga pasyente an nahidugang ha San Miguel, sanglit 10 na ngatanan an nagpositibo dida han munisipalidad.
Ha Bato, Leyte umabot na ha 15 katawo an natapnan kay may nahidugang kakulop nga usa nga kaso. Sugad man liwat an Santa Fe, may nahidugang nga usa nga kaso. An RHU-Santa Fe in temporaryo nga ginpasadhan para han disinfection. Nahirehistro gihapon kakulop an syahan nga Positive Case ha Tabontabon, Leyte.
Duha nga positibo an nahidugang ha Basey, Samar, sanglit ha kabug-usan 22 na katawo an natapnan dida han nasabi nga bungto. Samtang ha Villareal, tulo na an kaso kay mayda usa nga nahidugang kakulop.
Mayda naman nagpositibo nga bag-o ha Naval, Biliran ug hiya in doktor ha Biliran Provincial Hospital. Nahisumat nga nagpa-admit hiya ha usa nga hospital ha Tacloban para hin surgery ug samtang naka-confine hiya ha hospital ginkuhaan hiya hin swab test ngan nagpositibo an resulta.
Didto naman ha Southern Leyte, an bungto han Bontoc in may duha nga bag-o nga pasyente. Hira in mga kalalakin-an nga umuli tikang ha Cebu. Unom na ka tawo ngatanan an natapnan han kagaw dida hini nga bungto. Ngan ha syahan nga higayon, an munisipalidad han Malitbog in mayda na usa nga residente nga natapnan gihapon han corona virus.
Kakulop gihapon nga adlaw, nagpalusad hin kamanduan an DILG-Joint Task Force COVID Shield para hin temporaryo nga pagpa-undang han pagbiyahe han mga Locally Sranded Individuals ha Cebu City. Dida hini nga Advisory, an mga na-stranded nga katawhan in deri puede gumawas ngan sumulod ha Cebu City.
An Cebu in ginkokonsiderar nga hot spot han virus kay sobra na 4000 an natapnan didto ngan kadam-an nga nanguli nganhi ha Eastern Visayas nga tikang ha Cebu in positibo han kagaw. # (KEVIN SIOSANA)
