Isumat.com/9:03AM,June 20,2020
Nadugangan na liwat an lista han mga medical personnel nga natapnan han COVID-19. Yana nga aga, hi Biliran Governor Rogelio Espina in nagsumat nga may doktor nga tikang ha bungto han Naval an nagpositibo han virus.
Dida han pahayag ni Espina, an nasabi nga doktor in na-confine ha usa nga hospital ha Tacloban City kay naka-schedule hin operasyon. Samtang naka-admit hiya didto han hospital, gin-swab test hiya ngan positibo an resulta.
An nasabi nga Medical Practitioner in nagtatrabaho ha Biliran Provincial Hospital, sering pa ni Espina. Waray liwat igpahayag kun diin nga hospital ha Tacloban na-confine an pasyente.
Hapagkayana, maupay an panlawas han doktor ngan waray sintomas han virus. Aadto hiya yana ha COVID Isolation Unit han probinsya. Nagpa-ilarum na hiya hin ikaduha nga swab test ngan ginpapamulat an resulta.
Ha probinsya han Biliran, mayda na nahi record nga unom nga Positive Cases ug ha mga bungto ini han Naval, Caibiran, Almeria, Kawayan ngan Biliran. Nagpapabilin nga COVID-Free an Maripipi, Culaba ngan Cabucgayan.
Ha bug-os nga Eastern Visayas, porlomenos 30 na nga medical personnel an na-alakbatan han corona virus. #
