Isumat.com/4:00AM, June 10, 2020
Antis nan-ngaturog kagab-i an mga mulopyo han Eastern Visayas, ginpabalunan kita hin pakalas ngan makahurulop nga notisya nga nadugangan hin 19 ka tawo an positibo han corona virus ha aton rehiyon. Dara hini, tigda lomobo ha 72 an natapnan han virus ha aton lugar.
An Baybay City in may bag-o nga 6 Positive Cases ngan kagab-i mismo hi Mayor Jose Carlos Cari in nagsumat nga mga Locally Stranded Individuals (LSI) ini nga natapnan. Na-stranded hira ha Cebu ngan nakabalik ha Baybay hadton Sabado ngan Domingo. Ginklaro liwat ni Cari nga tikang han ira pakabalik, deretso hira ha Isolation Facilities han syudad ngan waray igka-urusa ha bisan hin-o labot la han health personnel han syudad.
Igindugang pa ni Cari nga maupay an kahimtang han panlawas hini nga unom ka tawo ngan waray iginpapakita nga sintomas han virus. Naghangyo an alkalde ha iya nasasakupan nga deri mag-panic kay kontrolado han LGU an sitwasyon.
Ha luyo nga bahin, an San Isidro, Northern Samar in nahilakip gihapon dida han mga lugar kun diin may na-alakbatan han kagaw ngan 6 pa gud ka tawo. Iginsumat han Northern Samar Provincial Health Office nga mga na-stranded gihapon ini nga mga residente ha Manila nga umabot ha Region 8 hadton Mayo 27. Hira in iginkadungan dida han barko nga dumo-ong ha Tacloban kun diin sakay an taga Jaro, Leyte nga naha-una nga nag-positibo.
Nagsering pa an NSPHO nga waray pa igka-urusa han ira tagsatagsa nga pamilya ini nga mga tawo kay deretso gihapon hira ha Isolation Unit han LGU tikang han ira pag-abot ngan tobtob yana waray sintomas han sakit nga iginpapakita.
An syudad han Ormoc in may bag-o nga lima nga kaso, pero an City Government in waray pa magpagawas hin opisyal nga pahayag. Mayda impormasyon nga nahikay an Isumat.com tikang ha Ormoc nga ini nga lima in tikang ha Cebu nga na-stranded gihapon dara han lockdown.
An LGU-Pastrana, Leyte in waray pa maghatag hin official statement mahitungod han syahan nga Positive Case ha ira bungto.
Samtang, an nahireport nga nag positibo ha Calubian, Leyte in gintotoohan nga upod han contact tracing han nagpositibo nga estudyante ha Naval, Biliran nga umuli tikang ha Manila.
An DOH Regional Office in nakatalaan maghatag hin kadugangan nga detalye kasumpay hini nga mga bag-o nga Covid Positive Cases ha Region 8 yana nga adlaw.
Nagpapadayon naman an panguli han mga na-stranded nga mulopyo tikang ha Manlla pinaagi hin pribado nga sarakyan; an mga OFWs pinaagi hin chartered flights; ug an Balik-Probinsya in ma-arangkada na liwat yana nga semana.
An DOH ug an mga opisyales han mga LGUs in padayon nananawagan ha publiko nga hingpit nga maghirot ngan deri tumagya labi na yana nga nagtitikadamo ngan magtitikadamo pa an makaka-uli nga mga LSI ngan OFWs. # (KEVIN SIOSANA)
