Isumat.com/Mayo 6, 2021
An opisina han Gobernador han Leyte in nagmando hin 60-dias nga Preventive Suspension kontra kan Atty Edwin Jomadiao, an Vice Mayor han Alangalang.
Dida han dokumento nga nahikay han Isumat.com, an duha ka bulan nga ka-suspender kan Jomadiao in epektibo ha oras nga makarawat niya an papeles kasumpay hini nga kamanduan. Nagsering an surok han impormasyon nga dida han Mayo 4, 2021 iginserbe an Suspension Order ngadto han bise-alkalde.
Ini nga pitad han Gobernador in nag-ugat han Kaso Administratibo nga iginsalawad ngadto ha Leyte Sangguniang Panlalawigan (SP) han Alangalang Sports Complex and Gallera Inc. nga ginpanaglawasan ni Lowell Marmita. An grupo an nagsampa ha SP hin Opression and Grave Abuse of Authority kontra kan Jomadiao.
Hadton Marso 2017, hi Jomadiao nga konsehal pala hadto nga panahon ngan Chairman han Committee on Games and Amusements han SB-Alangalang an nagmando nga undangon an operasyon han pagpabulang han nasabi nga grupo.
Tungod hini, an grupo nira Marmita in nagsalawad hin reklamo ha Leyte Prosecutors Office ug an prosekusyon in nakatara hin Probable Cause han reklamo nga Usurpation of Official Functions. Sumala han DOJ-Leyte, an alkalde la han LGU an may gahum pag-emporsar hin ordinansa ngan waray otoridad hi Jomadiao nga konsehal hadto nga oras.
An Prosecutor in nagrekomendar nga igsalawad ini nga kaso ha korte ngan aadto na ini yana ha MTC-Alangalang. Hi Jomadiao in nagpiyansa kasumpay hini nga kaso hadton Enero 2021.
An grupo nira Marmita in nagsampa liwat hin kaso administratibo ha Ombudsman, pero an Ombudsman an nagpasa han reklamo ngadto ha Leyte-SP nga amo an may katungod nga magpalusad hin resolusyon o desisyon han isyu. Ini nga kaso in pending pa ha SP ngan waray pa resolosyon.
An Alangalang Sports Complex and Gallera Inc in nag-alegar nga gingagamit ni Jomadiao an iya posisyon komo Bise-Mayor yana han bungto kay mayda daw “pressure” tikang han opisyal basi ig-withdraw an kaso kontra ha iya. Nagsering an grupo nga pira na nga okasyon nga ginpapatambong hira han sesyon han SB-Alangalang basi daw mahisgutan an aktibidadis kasumpay han burublang.
Nagsering an hugpo nga klaro ini nga deri matadong kay para ha ira, ini nga pitad ni Jomadiao in deri nasusubay han tinatawag nga “In Aid of Legislation.” Tungod hini nga “pressure” nagpasaka hin mosyon an grupo ngadto han opisina han gobernador nga magpagawas hin Preventive Suspension kontra han opisyal basi deri magamit an iya poder kontra han grupo.
Ini nga mosyon in gin-istudyuhan han Blue Ribbon Committee han SP-Leyte ngan iginrekomendar han komitiba ngadto han gobernador nga suspenderon hi Jomadiao.
Sumala han dokumento tikang han Office of the Governor, gin-istudyuhan hin hingpit ini nga isyu, ngan katapos hin masusi nga pagtirutimbang han mga balaud, nagdesisyon nga magpagawas hin 60 Days Preventive Suspension Order.
An Alangalang Sports Complex and Gallera, Inc in pribado nga grupo ngan ginkokomponer hin pribado nga mga indibiduwal an Board of Directors. Hiungdan hini, nagawas nga waray koneksyon an LGU han pagpadalagan han grupo ug an gintikangan hini nga isyu in hadto pa han Marso 2017.
Sumala naman hin kadam-an nga tag-obserbar, waray ini kolor hin pamulitika kay natabo ini haros upat na ka tuig an nakalabay ug an Prosecutors Office, MTC-Alangalang ngan Sangguniang Panlalawigan in indepiendente nga mga ahensya ngan waray labot hin pulitika ha mga LGUs. #
