Isumat.com/1:20PM, July 23, 2020
Nakarahibot yana ha magkalainlain nga bungto han Eastern Samar tungod kay gintikangan na an panhatag han tag Dos Mil pesos nga ayuda pinansyal ha ilarum han Provincial Eemergency Assistance Program (PEAP).
Ini nga cash assistance in para ngadto han mga panimalay nga waray makatagamtam han tag 5 Mil pesos tikang han kanan DSWD Social Amelioration Program nga may panuyo nga matagan hin bulig an mga kablasanon nga grabe na-apektaran han pandemya han COVID-19.
Tungod han panlimbasog ni Governor Ben Evardone ug han Sangguniang Panlalawigan, nahimugso ini nga programa basi katagan liwat hin ayuda an waray mahilakip han SAP.
Hinsabutan nga deri la mga kablas an nagpapakarawat han PEAP kay bisan an mga pensyonado, may trabaho, may negosyo ngan bisan mga empleyado han gobyerno in nagkatatagan.
Iginkalipay naman ini nga pitad han kadam-an nga mga Estehanon labi na an waray makatagamtam han SAP, pero mayda liwat iba nga mulopyo an nagpahayag nga unta deri na gintatagan an maupay an kahimtang ha kinabuhi ngan ig-gahin nala ha iba nga proyekto an pondo.
Kakulop (Hulyo 22) gintikangan an panhatag han PEAP ha Mercedes ngan an iba nga munisipalidad in masunod na gihapon pag-distribuer han tag Dos Mil nga ayuda. #
