Duha nga empleyado han National Food Authority-Regional Office an nahipaslak ha selda ngan posible umatubang hin kaso dara han gin-aalegar nga deri maupay nga pamatasan nga ira iginpakita ha checkpoint ug ha atubangan mismo ni Mayor Macel Avestruz han Barugo, Leyte.
Dida han impormasyon tikang ha Barugo Municipal Police Station, ginkilala an mga NFA personnel nga hira Jaime Indita, 46 anyos, NFA truck driver; ngan hi Karyll Basea, 30 anyos, NFA Grains Operation Assistant I. Hira ngaduha in mga residente han Brgy. Baybay, Carigara, Leyte.
Sumala han report, kanina han aga hira Indita ngan Basea in sakay han kanan NFA service vehicle nga may plate Number SHP 218 ngan masulod unta hira ha Barugo kay mayda daw nira kukuhaon didto han bungto. Pero dida han checkpoint ha Brgy. Can-omantag, igin-alegar nga nagin arogante an gi-os ngan panmulong han duha. Ginpapaki-anhan hira han kapulisan kun ano an ira toyo ug an ira mga dokumento, pero sugad-sugad nga waray hira magkakasarabot mahitungod han prosedemiento ha checkpoint.
Dara hini, ginsagdunan han checkpoint personnel an duha nga pumakadto ha munsipyo para igka-istorya hi Mayor Avestruz ngan matuhay an isyu dida han checkpoint. Subay pa han report, pag-abot han duha ha municipal hall, naghitaas pa an ira boses ngan ginkukustyon nira an pamaagi han LGU han Working Pass Policy. Ini nga ira mga aksyon ngan pamulong in dida mismo han presensya ni Avestruz ngan pira nga empleyado han muncipyo.
Han makapamuhay-puhay na an duha, dida pala nira nasabtan nga an ira kaatubang amo na mismo an alkalde han bungto. Dara daw nga deri nira kilalado an mayor, nakahimo hira hin pagsiyagit ngan makagyakan hin deri maupay nga mga pamulong. Dida hini, gin-angkon han mga suspetsado nga deri hira nakilala kan Avestruz ngan mayda la unta nira kukuhaon ha Barugo.
Kadagmitan nga ginkustudiya han Barugo PNP hira Indita ngan Basea ngan gin-aandam na an kaangayan nga kaso nga posible igsalawad kontra ha ira. #
(Posted 2:45 PM, March 31, 2020)
