Isumat.com/10:39AM, June 13, 2020
Katapos hin pira ka tuig nga pagsupil han mga kaaway han gobyerno ngan pagmintenar han kamurayawan ha Mindanao, nakabalik na ha Eastern Visayas an 19th Infantry Battalion han Philippine Army.
Dida han nakalabay nga adlaw, an mga tropa han 19th IB in umabot ha Calbayog City Airport sakay han C-130 plane han AFP. Hira in madagaang nga ginsugat han mga opisyales han 8th Infantry Division ha panguna ni MajGeneral Pio Dinoso.
An nasabi nga batalyon nga pinangungunahan ni Lt Col Jasper Justito Tecson an igpapasarang ha mga lugar nga nasasakupan han San Jorge, Gandara ngan Matuguinao ha probinsya han Samar.
Ini nga grupo in lumakat ngadto ha Mindanao upat na ka tuig an nakalabay ngan temporaryo nga nagpa-ilarum han pwersa han 10th Infantry Division ha North Cotabato. Antis hira nagserbe ha Mindanao, didto hira na-deploy ha Kananga, Leyte.
An 8th ID amo an mother unit hini nga batalyon. Hapagkayana, mayda walo nga Infantry Battalion ha bug-os nga Sinirangan Bisayas. #
