Isumat.com/9:15AM, June 23,2020
Paghirot ngan igpabilin an mahimsog nga panlawas basi humalawig an kinabuhi ngan makatagamtam han yinukot-yukot nga salapi komo pahalipay.
Amo in an makalilipay nga na-eksperiensyahan hin duha nga babaye nga taga Catarman, Northern Samar ngan Borongan City, Eastern Samar tungod kay umabot hira han edad nga 100-anyos. Denhi ha Pilipinas, may balaud nga an hin-o man nga makakatugpa hito nga pangedaron in mayda 100k tikang National Government, labot la han cash gift tikang han LGU.
Sumala han report han Catarman Information Office, hi Cristina Tapang, usa nga retirado nga magturutdo, in nagsa-urog han iya ika-100 nga kaadlawan dida han Oktubre 2019. Han nag-agi nga semana, Hi Mayor Francisco Rosales ug an iya grupo in personal nga pumakadto han balay ni Tapang ngan iginduhol ha iya an pahalipay. Hi Rosales an naghatag han 100K tikang ha Catarman-LGU, samtang hi DSWD Provincial leader Nena Getalado an nagduhol han 100K tikang ha National Government. Sumatotal, malagatak nga Dos Syentos Mil Pesos an nakarawat ni Tapang.
Nasorpresa an benefeciario hini nga okasyon ngan duro an iya pagpasalamat han kalungganayan nga iya na-agoman. Hi Tapang in daraga ngan hiya an nagsuporta han pag-eskwela han iya mga umangkon.
Ha luyo nga bahin, an Centenarian (100 years old) nga hi Leonila Cillo, han Brgy Hindang, Borongan City, in nakadangat han iya ika-100 nga birthday hadin Agosto 2019. Ha masunod nga pira ka adlaw , hi Apoy Yoning in nakatalaan kumarawat han 100K tikang ha National Government ug kadugangan nga 50 Mil pesos tikang ha LGU-Borongan.
Hi Apoy Yoning in nagsaysay nga an iya sekreto nga umabot hiya hito nga edad amo an masunod: Pagsarig ngan pag-ampo ha Ginoo, pirmi magin malipayon, deri maki-aawayon ngan deri magpinanlibak. Hiya in nagpaplano nga pag-abot han iya ika-101 nga kaadlawan hiton Agosto, makikigsarayaw hiya upod han iya pamilya ngan mga kasangkayan.
Nagreport pa an Borongan City Information Office nga labot la kan Cillo, mayda pa iba nga Centenarians ha ira syudad. Hi Antonio Alido han Brgy Campesao yana nga Disyembre 2020, samtang hira Rosendo Tejero han Brgy Lalawigan ngan Vicenta Calinaya han Brgy Libuton in tapos na maka-agom han pahalipay.
Ini nga pahalipay in iginlalarang han Republika Acta 1086 nga naghahatag hin pagsaludo ngan kadugangan nga beneficio ngadto han mga Filipino Centenarians. #(KEVIN SIOSANA)
