Isumat.com/7:01AM, Enero 30, 2021
Magtitikang na an pangandaman han Singbahan Katoliko denhi ha Sinirangan Bisayas kasumpay han paghatag hin bulig han ira grupo basi mabakunahan an katawhan han Covid-19 Vaccine.
Hi Fr, Chris Arthur Militante, an Media Relations Officer han Archdiocese of Palo, in nagpahayag nga magkakaada hin hirihimngraw an Arsobispo han Palo John Du ug han mga kapadi-an ha bug-os nga rehiyon yana nga adlaw (Enero 30) basi mahilatag an detalye han aktibidad.
Kun manunumduman, nagdesisyon an Catholic Bishops Conference of the Philippines (CBCP) nga igpagamit an mga singbahan ngan iba pa nga facilidad han Romano Katoliko nga singbahan komo mga lugar nga puede magdumara han panmakuna. Ini in agud makabulig ha mga pitad han magkalainlain nga gobyerno han kalibutan kontra han makamaratay nga sakit.
Nagsering gihapon hi Militante nga an mga opisyal han Archdiocese ngan kapadi-an ha Region 8 in andam magpabakuna ha publiko basi mahipakita ha mga katawhan ngan magin susbaranan hira.
Dida han mao nga meeting han CBCP, usa nga Pilipino nga Dominican Priest-Molecular Biologist an nag-esplikar ha mga obispo kun ano ka-importante an bakuna ngan dida nawara an pagruhaduha han iba han katalwasan han bakuna.
Sumala pa kan Militante, an Singbahan Katoliko in dako an impluwensya ha mga magtinoohon sanglit angay buhaton ini nga pitad basi damo an magpabakuna ngan maka-iban-iban han natatapnan han kagaw. Nagsering pa hiya nga waray nira ginpipili nga bakuna, kun ano an magigin abilable, magpapabakuna an mga kapadi-an.
Usa na ka semana an nakalabay, hira Santo Para Francis ngan hadto anay Pope Benedict in nagpabakuna na didto ha Roma, Italya. #
