Isumat.com/8:07AM, Enero 6, 2021

Nagtitikadamo an mga Local Government Units ha Rehiyon Otso nga nag-aandam hin pondo basi igpalit han bakuna kontra han Covid-19 ngan libre ini igpahi-agom ngadto han ira mga residente.

Kakulop, Enero 5, hi Mayor Richard Gomez in nagpasamwak nga an LGU-Ormoc in mag-aalutaga hin 300 Milyones Pesos para pagpalit han bakuna. Ini in libre nga matatagamtaman han mga Ormocanon.

Sumala han report han Ormoc News and Updates, an mga kaapi han Local Task Force ha panguna ni Gomez in mag-iiristorya yana nga semana basi mahisgutan an surok han pondo, ano nga bakuna an papaliton ug an mga sektor nga tatagan hin prayoridad nga makatagamtam han bakuna.

Pero iginpahayag na ni Gomez kakulop nga an mga senior citezens, frontliners ngan may mga sakit an tatagan hin prayoridad nga maha-una han babakunahan.

Tulo na ka semana an nakalabay, hi Governor Mic Petilla in nagpahayag nga an probinsya han Leyte in mag-gagahin hin budget para han bakuna ha mga Leytenos.

Han una nga semana, ginsundan liwat ini han pasabot ni Eastern Samar Governor Ben Evardone nga an mga Estehanon in makaka-agom gihapon han libre nga bakuna tungod han pondo nga pag-aandamon han Provincial Government. #