Isumat.com/3:00PM,May 1, 2020
Sering pa man hin usa nga darahunon…..an nakakaplagan nga dako nga grasya in nagtitikang hin ginagmay nga mga paningkamot.
Amo ini yana an grasya nga natatagamtaman han mag-asawa nga hira Florante ngan Evelyn Dadios ug han ira pamilya nga nag-uukoy ha Brgy Pancho Villa, Sogod, Southern Leyte. Ini nga grasya amo an pinaagi han pagtanum ngan pagbaligya han makaruruyag ngan matam-is nga strawberry.
Kun aton manunumduman, ini nga prutas in hamurasak la ha Benguet ngan ha Mountain Province, pero ha paghagos hin katuigan mayda na hini pira nga mag-uuma nga nagtatanum denhi ha Leyte parehas nala ha Jaro ngan Burauen labi na ha bukiron nga mga lugar.
Ini nga strawberry backyard farming didto ha Sogod, Southern Leyte in na-agi-an la han grupo tikang ha Department of Agriculture-Region 8 hadin Abril 28 han ira opisyal nga byahe ngadto ha Maasin City.
Subay han impormasyon, umuli tikang ha Baguio City an bugto ni Evelyn nga may dara nga lalong hin strawberry. Ini amo an Japanese Shuga strawberry variety nga iya pasalubong kan Evelyn. An mag-asawa in mau-yatom nga nagtanum ngan gintimangno in inga lalong….ug tikang hini nga usa-usa gudla nga lalong, nahimo na ini nga dako nga grasya kay nakakakuhida na hira hin 10 mil pesos kada semana tikang han ira tanuman han strawberry.
An mga byahedor nga naagi dida hini nga ruta nga Mahaplag-Sogod amo an ira nababatasanan nga mga suki nga nakakapalit han presko nga prutas ha kantidad nga 500 pesos kada kilo. Dara hini, kada adlaw nakakagbaligya hira hin 3 kilos. Ngan yana determinado an mag-asawa nga pahalu-agon an ira farm pinaagi han usa ka ektarya nga sapit nga lote.
Dara kay an strawberry in madali madaot, deri hira nag-aani kun waray napalit, an ira istilo an mga napalit mismo amo an manmumuro han prutas ngan igpapatimbang, sanglit garantisado nga presko gud ini.
Iginsumat nira Florante nga an LGU-Sogod ha panguna ni Mayor Imelda Tan in naghatag hin 5 mil pesos nga ayuda ha ira pagtikang ngan iginpalit ini nira hin mga higamit ha pagpatubo han mga tanum. Ngan ira gihapon iginpapasalamat an ira natambungan nga local farmers training nga gindumara nira Municipal Agriculturist Julito Abihay ngan Agri Technician Alvin Calimbas.
Hi DA Asst. Director Elvira Torres nga upod han grupo nga nakakita hini nga farm in nagtagusya han panlimbasog han mag-asawa hini nga ira pakabuhi ngan iya iginsaad nga an ahensya in magpapadangat han kaangayan nga bulig basi mapa-uswag pa an kina-adman han mag-asawa hini nga pakabuhi ug an iba pa nga residente didto nga inntresado. Sering pa ni Torres, susumatan niya an Regional Executive Director han DA basi matagan dayon han kaangayan nga aksyon ini nga malaum-laum nga strawberry farming han magti-ayon nga Dadios. #
