Isumat.com/9:10AM, July 16, 2020
Nagpatapod an Tacloban City Government nga deri magagamit hin maraot nga panuyo an mga personal nga impormasyon nga iginhatag han mga indibiduwal nga nagparehistro ha internet basi makakuha han Quick Response (QR) Code.
Hi Randy Calahi, an nangungulo han Information Management Office han syudad, in nagpasarig nga bastante an mga security features ngan firewalls ha ira sistema sanglit waray iba nga makaka-access ngadto han mga personal nga impormasyon.
Sumala kan Calahi, nagin hingpit ngan ira gud gintutukan an pag-istudyo hini nga sistema sanglit imposible nga ma-hack ini nga mga records. An mga nagpaparehistro in gin-aaro-an han ngaran, address ngan contact numbers.
Nagsering pa an opisyal nga hapagkayana, naabot na hin 80 porsyento han mga establisemento ha Tacloban an nakigsumpayan ha ira basi mabutangan han ekipahes para hini nga QR Code. Ginlalauman nga ha pagtapos han Hulyo, syento porsyento na ini nga mapapasunod ha Tacloban.
Sobra na hin 60 Mil ka tawo an nakakuha han QR Code pinaagi ha internet, samtang 70 Mil nga QR Code Pass an iginpanhatag ha mga barangay. Ini nga QR Code in gagamiton ha pagsulod han mga opisina ngan establisemento denhi ha Tacloban ngan dako an gamit hini ha contact tracing han posible nga natapnan han COVID-19.
Gin-aaghat han LGU-Tacloban an mga residente han syudad sugad man an mga may transaksyon denhi ha Tacloban nga tikang ha iba nga lugar nga kumuha hini nga QR Code.
Nangaro naman hin dispensa hi Calahi tungod han mga reklamo nga mahinay an website han City Government sanglit madugay o deri natatapos an pagrehistro ha internet. Sumala kan Calahi, sugad ini an natatabo yana kay nagdudurungan pagparehistro an yinukot-yukot nga mga indibiduwal. #
