An mga taga Northern Samar nga na-stranded ha Cebu han ira pag-abot ha Calbayog City kakulop, Mayo 26, 2020. (Photos by Northern Samar Provincial Information Office)

Isumat.com/9:14AM, May 27, 2020

Katapos hin sobra duha ka bulan nga pagkabaraka ngan kamingaw ha ira tagsatagsa nga pamilya, nakabalik na ha Northern Samar in 39 ka tawo nga na-stranded ha Cebu dara han iginpasunod nga lockdown tungod han corona virus.

Kakulop han aga, Mayo 26, ini nga mga Nortehanon in umabot ha Manguinoo Port ha Calbayog City sakay hin usa nga barko tikang ha Cebu ngan gintapo hira han mga opisyales han ira lalawigan ha panguna ni Provincial Disaster Officer Rei Josiah Echano.

Sumala han report han Northern Samar Provincial Information Office, kasagaran hini nga naka-uli in mga estudyante. Hira in naghangyo hin bulig kan Governor Edwin Ongchuan basi makauli na hira ha ira tagsatagsa nga pamilya.

Hi Ongchuan amo in nagmando han Provincial Health Office ngan PDRRMO nga tagan hin bulig ini nga mga Nortehanon basta sumunod la hira han mga kondisyones nga iginlatag han probinsya. An mga rekisitos nga kinahanglan basi makabalik ha Northern Samar amo an masunod: katorse ka adlaw nga kwarentina antis hira umuli ngan may certipikasyon han barangay kun diin hira na-stranded; medical certificate tikang han syudad o bungto kun diin hira na-stranded; ngan travel authority tikang ha PNP.

Ini nga 1st batch tikang ha Cebu in negatibo an resulta han Rapid Test ngan mayda nira affidavit nga magpapa-ilarum hin duha ka semana nga kwarentina pag-abot ha ira bungto.

56 ka tawo unta ini nga grupo, pero 39 la ha ira an nakakumpleto han mga rekisitos.

An grupo in gindara ha Mondragon, Northern Samar para han ira temporaryo nga kwarentina samtang ira ginhuhulat an mga behikulo tikang han ira tagsatagsa nga munisipalidad kun diin ira igpapadayon an ira kwarentina.

An Cebu amo an usa han mga syudad ha aton nasud nga may hitaas nga ihap hin mga kaso han natapnan han Covid-19. # (KEVIN SIOSANA)