Isumat.com/7:34AM, October 31, 2020
Katapos hin haros pito ka tuig tikang mag-antos hin mga guba an pira nga parte han Tacloban City Covention Center o mas kilalado ha tawag nga “Astrodome”, an facilidad in iginpapa-ilarum na yana hin paghingayad ngan pagta-od hin bag-o nga mga ekipahes.
Nagsumat hi Engr Arnaldo Bonifacio, an nagungulo han Tacloban DPWH District, an ira ahensya an natu-inan nga magdumara han nasabi nga proyekto nga ginkokomponer hin Phase 1 ngan Phase 2 ug kantidad tanan hin sobra 80 Milyones pesos.
Nagsering hi Bonifacio nga pira na ka semana nga nag-arangkada an pagtrabaho ha sulod han Astrodome nga lakip dida han Phase 1. Upod na denhi an pag-ayad han mga lounge, comfort rooms, bleachers, mga bintana, electrical facilities sugad man an pagtaod han moderno nga scoreboard ngan de-kalidad nga salog para han basketball court subay han patakaran han International Basketball Federation (FIBA).
An Phase 1 in ginlalauman nga matatapos hiton Pebrero sunod nga tuig. Kataliwan hini, magtitikang na an Phase 2 kun diin an gawas naman han estraktura an pag-aaydon, sering pa ni Bonifacio.
Damo nga parte han Astrodome an nagkaguguba tungod han Bagyo Yolanda hadton 2013 ug an iba nga parte in ginta-oy ngan nagkalulukba. Pero bisan pa man kun sugad ini an kahimtang han facilidad, padayon ini nga gingamit hin mga torneo ha sports, mga beauty contests, concerts, ngan magkalainlain nga katitirok.
Dida han magkaada hin torneo an Eastern Visayas Collegiate Athletic Association (EVCAA) Mens Basketball hadton 2018, personal nga nakit-an ni Leyte 1st Dist. Congressman Martin Romualdez an sitwasyon han Astrodome. Hi Romualdez ug an Tingog Party List nga gintataglawasan ni Rep Yedda Romualdez an panguna nga nagsuporta han EVCAA Tournament.
Hadto mismo nga takna, hi Cong FM nga amo yana an Majority Leader han Kongreso an nagsaad nga manlilimbasog hiya basi mahibalik o magtika-upay pa an Astrodome, ngan yana harani na ha kamatuoran an iya iginpatapod.
Labot la han mga aktibidadis ha sulod han facilidad, an aadi ha gawas nga parte han building in ginhimo gihapon nga mga opisina hin pira nga departamento han City Government, sugad man mayda liwat pribado nga mga establisemento.
Ginlalauman nga kun matapos na an paghingayad hini, magtitikadamo an oportunidad hin dagko nga katitirok ngan mga torneo dida han facilidad nga makakabulig pagpadukwag han turismo, kultura, pa-ugnat ha kusog ngan ekonomiya han Tacloban sugad man ha Eastern Visayas. #
