Isumat.com/2:17PM, October 30, 2020
Mayda na liwat drug den nga nabungkag han Philippine Drug Enforcement Agency (PDEA) han pagrondahon ini han ira mga operatiba ha usa nga buy-bust operation ha Brgy 62-A, Sagkahan, Tacloban City, kakulop, Oktubre 29, 2020.
Dida han impormasyon tikang ha PDEA-8, usa nga kwarto han hotel nga Green Beds Inn an ginhimo nga drug den han mga nagdudumara han lugar nga baragisan han shabu.
Lima nga suspetsado an na-aresto ngan ini in ginlalakipan han nagdudumara han drug den ngahira Lotlot Separa ngan Clint Millano. Upod han nadakop an gintotoohan nga parokyano han droga nga hira John Russel Mamita, Crisseann Samson ngan Ariel Jones Ebal.
Dida han nasabi nga operasyon, an mga otoridad in nakapalit ngan nakakumpiskar hin pito ka sachet hin gintatahapan nga shabu may kabug-aton nga 15 gramos ngan balor hin 107 Mil pesos. Narekupo gihapon in duha nga sachet nga waray na sulod nga shabu ngan magkalainlain nga drug paraphernalia.
An mga suspetsado in temporaryo naka-detener ha PDEA-8 ngan nakatalaan umatubang han mga kaso nga igsasampa kontra ha ira.
Pira pala ka semana an nakalabay, duha nga drug dens an ginronda han PDEA ha Sagkahan District ngan pira nga suspetsado an na-aresto. #
