Isumat.com/12:10PM, July 6, 2020

Komo pangandaman han pagkabalik han mga Locally Stranded Indivisuals ngan posibilidad nga mayda matapnan han COVID-19, an LGU-Borongan City ha Eastern Samar in naghihimo hin kadugangan nga Isolation Faciilities.

Subay han pahayag han Borongan City Information Office, nagdesisyon hi Mayor Jose Ivan Agda nga magtukod hini nga mga facilidadis basi maseguro nga deri magkukulang an akomodasyon para han mga LSI. Dida hiton Hulyo 10, ginlalauman nga magkaka-abot an kadugangan nga LSI ha Region 8 katapos han duha ka semana nga suspension han ira pagbiyahe.

Sumala kan Agda, hapagkayana makaka-akomodar an LGU hin 200 nga LSI kun maka-uli hira. Pero labot la hini, naghihimo pa an LGU hin kadugangan nga 200 bed capacity nga Isolation Area. An mga eskwelahan an ginagamit yana nga Isolation Units, pero ha takna nga bumalik na an klase, deri na ini gagamiton, sanglit kinahanglan hin kadugangan nga facilidadis.

An mga lugar nga gintutukuran han Isolation Units in namumutang ha JTR-Brgy Songco, Brgy Suhotan, Brgy Santa Fe, Mayapangdan, San Jose ngan Benowangan. An Motorpool han LGU in magigin Isolation Area gihapon.

Katapos han pandemya, ini nga mga istraktura in hihimoon nga Primary Health Care Facilities, pahayag pa ni Agda.

An Borongan City in nagpapabilin nga COVID-Free. An nahireport nga natapnan han COVID nga residente han Borongan in waray didto han lugar ngan nagpositibo hiya ha Tacloban kay nagtatrabaho man hiya ha EVRMC. Ini nga health worker in naka-recover na tikang han virus infection #