Isumat.com/8:39AM, July 6, 2020

Nagtikahitaas an porsyento han recovery rate han pasyente han COVID-19 ha Eastern Visayas. Kakulop (Hulyo 5) igin-report han DOH Regional Office nga mayda bag-o nga 27 nga nakatalwas tikang han virus.

Tungod hini, umabot na ha 379 ngatanan an naka-recover tikang han virus. Kakulop, waray gihapon magpagawas hin resulta an mga laboratoryo ha EVRCTC ngan Divine Word Hospital sanglit nagpabilin ha 581 an mga nagkatatapnan. Hapagkayana, nagawas nga 65 porsyento an naka-recover ha aton rehiyon.

An active cases in aada ha 199. An mga natapnan nga health workers in umabot na ha 104.

Dida han mga nagpositibo, 93 porsyento an Asymptomatic, 6 porsyento an Mild Cases ngan 1 porsyento an Severe Cases.

Yana nga adlaw, Hulyo 6, magpapadayon an pagproseso han duha nga mga laboratoryo han mga swab samples kun diin natatambak na ini tungod han damu-damu-an nga iginsubmiter han mga LGUs para han confirmatory testing.

Hinungdan hini, nagdesider an DOH nga suspendido la anay an pagkarawat han swab samples ha EVRCTC tikang Hulyo 6 tobtob Hulyo 8, 2020. Utro kakarawaton an swab samples hiton Hulyo 9.

Ini in agud matapos an pag proseso han nakapila nga mga samples didto han laboratoryo nga an iba sobra na usa ka semana nga naka-istambay. #