Isumat.com/8:02AM, September 29, 2020

Dida hiton Huwebes, Oktubre 1, magtitikang an higante nga banggaay han LA Lakers ngan Miami Heat basi matudlok an magigin hadi han NBA para han 2019-2020 Season nga nadelatar tungod han pandemya. An Game 1 han best of 7 Series an bubuhaton hito nga adlaw ngan yana inaabat na an kamapaso han temperatura hini nga kampeonato.

Ano nga team an magigin kampeon? An Lakers ba nga nagtatarget han ira ika-17 nga titulo o an Heat nga naghihingyap han ira ika-upat nga korona? Llamado ba an grupo nira Lebron James ngan Anthony Davis? O mahipapadayon ba han Miami an ira mga pakalas ha ginpapaboran nga mga hugpo?

An Isumat.com in nagmalahimo panmaki-ana hin 12 nga mga eksperto ha basketbol basi mahingadayan kun hin-o para ha ira an magbubulsa han korona, pira nga oyag an matatabo, ngan ano nga mga rason an ira pagpili han magigin kampeon. Ngan aadi an ira mga panagna han magigin resulta han NBA Finals:

Jerry Abuyabor (Regional Head-Samahang Basketbol ng Pilipinas, Head Coach Southwestern University Baby Cobras): Lakers 4-1 o 4-2. Iglalatag han Lakers an ira “Super-Defense” nga ginpakita nira han bug-os nga season ngan play-offs. Nakaka-igbaw gihapon ha talento an LA. Ngan an mga kapasidad han players in nagin resipe para han ira hapsay nga teamwork. An Miami in mahamis an ball-rotation ngan under-rated pero deri hira makaka-akos pagperde han Lakers dida han serye.

Noli Cabibihan (SBP Region 8 Technical Head, Director/Head Trainer/Coach- Tacloban Active Basketball Center, Inc.) : Lakers 4-2. Nakakabentaha an Lakers ha Big Men pinaagi han ira Frontcourt nga ginkokomponer nira Anthony Davis, Dwight Howard, Javalee Mcgee, Markieff Morris ngan syempre, Lebron James. Mayda pa mga armas an Lakers nga waray pa kagagamit samtang an Miami nahipakita na nira ngatanan an ira pwersa dida han playoffs.

Julius Ross Lacaba (Commissioner- Eastern Visayas Collegiate Athletic Association): Lakers 4-2. Lamado an Lakers tungod han eksperiensya ha panguna ni James, Rajon Rondo, Danny Green, McGee ngan Howard nga nakagmulay na ha Finals. Bentaha gihapon an Lakers Big Men. Kinahanglan magpakita hin makusog nga depensa ngan mag-amot hin bastante nga puntos hira Jae Crawder ngan Andre Iguodala basi makahimo hin pag-ato an Miami.

Allan Garrido (Former PBA Player, Coach-Biliran Province State University Mens Basketball) : Heat 4-3. Kinahanglan magin consistent an puntos ngan depensa han Miami basi maka-pwersa hira hin Game 7. Amo ini an tsansa han Heat kay kakapuyon na an Lakers paglanat-lanat han mga scorer han Miami, labi na kay damo an nakakapikada nga Heat. Aada gihapon an makarit nga defensive stoppers kan Lebron ngahira Iguodala ngan Jimmy Butler. Aada gihapon hi Bam Adebayo nga igkakapanta ni Davis.

Wilmar Candido (Coach-E. Visayas Basketball League, Coach-National Basketball Training Center, Commercial/Regional/Provincial Leagues) : Lakers 4-1. Ha kamatuoran, puede ngani ig-sweep han Lakers an Miami, 4-0. Waray makaka-pugong kan Lebron. Damo hin duro it oportunidad nga puede himoon ni Lebron ngan damo iton assets han Lakers kun igkukumparar ha roster han Miami. Pero ha personal, maupay gad liwat kun makadaog an Miami kay Filipino-American an ira coach ngahi Eric Spoelstra ngan natagusya ako han Heat tungod han ira kamalinangpuson bisan kun dehado hira ha pagtikang han play-offs.

Eric Aguilar (Former Sports Editor-Divine Word University Bulletin) : Lakers 4-1. Syahan nga rason hi Lebron. Ikaduha an mapilit nga depensa han LA. Ikatulo an chemistry han grupo ngan ika-upat an poderoso nga bench players han LA nga may kapas paghulog hin bomba ha bisan ano nga oras. Dida hini nga mga aspeto, waray igpapanta an Miami.

Sheldon Ives Agaton (Former Head Coach – EVSU Eagles) : Miami 4-3. Mayda kapas an Heat nga makigdunganay han Lakers tungod han duro ka epektibo nga Zone Defense nga nagin susi han Miami basi nira paludhon an Milwaukee ngan Boston ha playoffs. Ini an gagamiton gihapon nira kontra han Lakers ngan aada pa an mga beterano nga maglilimitar han gi-os ni Lebron ngahira Butler ngan Iguodala. Disiplnado gihapon an mga Heat players ngan nasunod han taktika han ira coach ngan waray bu-aya o halot nga player kay burublig hira ngatanan ha pagkamada han puntos.

Stephen Mark Ida (Head Coach, Asst Coach- Sports Skills Academy, Vietnam; Coach/Trainer-TABCI, Basketball Clinics) : Lakers 4-2. Haros imposible nga balabgan an transition ngan isolation plays han Lakers. Paborito gihapon han Lakers an pick-and-roll nga ginbibidahan nira James ngan Davis ngan waray pa nakakasolbar hini nga iba nga teams. Ngan tungod han double team nga namagnet kan James ngan Davis, abri an oportunidad han pag cut-in nira Caruso, Green, KCP ngan Kuzma. Waray gihapon makakaposas kan Davis bisan kun mayda Adebayo an Miami. Maupay an opensa ngan may kapas pagdepensa an Miami, pero deri hira ma-obra ha Lakers. Davis an magigin Finals MVP.

Edwin Murillo (Coach- LNU Lady Huskies) : Lakers 4-2. Pero kun umabot ha Game 7 an serye, mapabor ako ha Heat. Kun maka-recover hin hul-os ha iya ankle injury hi Davis, makusog gud an Lakers. Ngan dako nga problema han Miami hi Davis kay puede hiya umatake ha sulod ngan gawas. Kun maglanat hi Adebayo kan Davis ha 3-point area, deri na magigin epektibo an Zone Defense han Miami. Chemistry para han Lakers. Kun karuyag han Heat nga magkampeon, dapat magin waray paghugpoy an kamakarit ni Butler, hi Tyler Herro in pirmi magin bayani, kinahanglan malupigan ni Dragic hira Rondo ngan Caruso ngan maka-score hira Duncan Robinson ngan Crawder.

Randylou Corregidor ( Coach-TABCI, Coaching Staff-Team Pilipinas, Asia Pacific Youth Cup, Singapore; Archdiocese of Manila, Xavier Team, San Carlos Seminary) Lakers 4-1 o 4-2. Haluag na hin duro an eksperiensya ha Finals han Lakers. Kukuri-an an Miami pakig-asdangay han Big Men han Lakers. Llamado an kalibre nira James ngan Davis kontra kanda Butler ngan Adebayo. Kun mag foul-trouble hi Adebayo, pi-ang na hin duro an Miami.

Arlan Baduria (Coach-NBTC, Commercial/Regional/Provincial Leagues, Trainer- LNU Lady Huskies) : Lakers 4-1 o 4-2. Bisan kun nagapil ak ha Miami dida hini nga serye, ha akon pagtoo Lakers an magigin kampeon. Kay-ano? Aada hi LBJ, kun mangusog ngani hi LBJ, iginsasagudsod la an nabalabag. Nakakalamang gihapon an Lakers ha Supporting Cast.

Nonelon De Paz (Coach/Trainer-TABCI, Coach-NBTC, Inter-School/Regl/Provincial Leagues) : Miami 4-3. Deri makakadali-dali hin pagperde han Lakers an Miami. Kinahanglan magin mauyatom an Heat ngan pag-abot ha Game 7, dako an ira tsansa kay puno pa hin enerhiya an Miami tungod kay barubata an ira mga players ngan tutugwayan hira han mga beterano ngahira Butler, Iguodala ngan Dragic. Ngan aada gihapon an epektibo nga mga estratihiya ni Coach Spoelstra.

Pira la ini han naghatag han ira prediksyon ngan mayda nira ginpapatamakan nga mga rason. Deri la kay basta-basta nga nau-ogop. Dako nga istorya ini nga Finals kay hi Lebron in maatubang han iya anay team nga Miami kun diin duha ka beses hiya nagin kampeon. Ha luyo nga bahin, Miami President Pat Riley in nagin coach hadto han Lakers han panahon nira Magic Johnson ngan nagin kampeon hira han liga.

Kun kamo an papaki-anhan….ano nga team an makakatilaw han himaya ngan makakagdara han trono komo hadi han NBA?

Comment na……