Isumat.com/5:43AM, Marso 20, 2021
Ha atubangan han nagsasapin-sapin nga problema durot han pandemya, kalamidad ngan magkalainlain nga eskandalo ngan anomaliya nga nakakapayong han nasud, an Pilipinas an nag-ika-52 dida han 153 nga mga nasyon ha kalibutan nga maglipayon ha survey han United Nations Sustainable Solutions Network para han tuig 2020.
Ha ika-upat nga sagunson nga tuig, an Finland an nagin numero uno dida han Worlds Happiest Countries. Tikang han 2017, an Finland an pirmi nangunguna han mao nga survey.
Ginpamatakaman han survey an masunod nga mga aspeto: Income han mga tawo; suporta nga hatag han gobyerno ngan iba pa nga sektor; kahilawig han kinabuhi han tawo; libre nga pagdesisyon han karuyag buhaton; ngan kun mayda pangurakot nga natatabo ha ira nasud.
An mga nasud nga nakasulod ha Top 10 amo an Finland, Denmark, Switzerland, Iceland, Norway, Netherlands, Sweden, New Zeland, Austria ngan Luxembourg.
An numero 11 tobtob 20 amo ini : Canada, Australia, United Kingdom, Israel, Costa Rica, Ireland, Germany, United States, Czech Republic ngan Belgium.
An mga poderoso nga Russia in numero 73 ngan ika-94 naman an China.
Na-obserbaran gihapon nga an mga Pilipino in mas malipayon kontra han South Korea(61), Japan (62) ngan Hongkong (78). Hataas naman an ranggo han Taiwan ha #25, samtang #31 an Singapore.
An mga amyaw nga nasud han Pilipinas in lumingkod hini nga mga pwesto: #54-Thailand; #82-Malaysia; #83-Vietnam; #84-Indonesia.
An mga nasud nga aadi ha ikog han survey amo an India, Malawi, Yemen, Botswana, Tanzania, Central African Republic, Ruwanda, Zimbabwe, South Sudan ngan Afghanistan.
Kun kamo it papaki-anhan, ano nga pwesto it Pilipinas , ngan natood ba kamo hini nga resulta han survey han United Nations?
