Isumat.com/1:21PM, Marso 22, 2021

Nakaka-abat hin kahadlok para han ira katalwasan an ginbayaan nga pamilya han nawara Ronaldo Aquino, an alkalde han Calbayog City nga namatay dida hin makangingirhat nga insidente duha na ka semana an nakalabay.

Hi Mark Aquino, an suhag nga anak han anay mayor, in nagbuyagyag nga deri hira natood nga mahugot an pag-implementar han tinatawag nga “Restricted to unit” an mga opisyal ngan tauhan han PNP Region 8 nga nahilambing han panhitabo kun diiin namatay an alkalde ug lima pa nga iba.

Dida han eksklusibo nga interview han The Calbayog Journal yana nga adlaw, Marso 22, nagsumat hi Mark nga nakahikay hira hin katatapuran nga impormasyon nga libre pagsulod-gawas ha PNP Regional Office an nasabi nga mga kapulisan.

Dara hini, baga-baga hin deri natutuman an “Restriction” ha ira subay han naha-una nga pahayag han liderato han PNP Regional Office.

Kun amo ini an kahimtang, delikado an amon pamilya, sering ni Mark. Bisan pa ngani an mayda posisyon ha gobyerno sugad han iya amay in waray pag-alngi pagpataya, asay pa ba an ira pamilya nga ordinaryo la nga mulopyo, dugang pa ni Mark.

Iginsaysay gihapon han anak han namatay nga alkalde nga basar han ira kalugaringon nga mga ebidensya, porlomenos 20 nga kapulisan an upod dida han operasyon nga nagin hinungdan han kaanaw han kinabuhi han iya tatay.

Hapagkayana, naabot pala hin pito nga kapulisan an gintudlok ngan pinanngaranan han PNP Regional Office nga posible may kalabutan han panhitabo.

Nagsering pa hi Mark nga tobtob han yana nga adlaw, waray pa makig-istorya ngan waray pa maghatag hin update han imbestigasyon an PNP ngadto han ira pamilya.

Nananawagan pa hi Mark ha PNP nga magin matadong ngan patas ha pag-imbestigar kay kun deri ini magigin toltol, magpapabilin nga mawawara an kumpiyansa han katawhan ha PNP ngan ma-aangyanan an tangkod ha serbisyo han mga “scalawags”.

Hapagkayana, an Philippine Army an naghahatag hin seguridad ha paglamay han patay nga lawas han opisyal sugad man han iya pamilya. Nakatalaan iglubong hi Aquino ha Calbayog hiton Marso 24.

An NBI in nagdudumara hin lain nga imbestigasyon ngan ginlalauman nga maghahatag hin update han ira aktibidad yana nga semana. #