Isumat.com/9:35AM, June 11, 2020
An makabag-o nga teknolohiya an makakapadagmit han pagtudlok han mga tawo nga iginka-urusa o iginkahibalag han mga nag positibo han COVID-19. Tungod hini an syudad han Ormoc in magamit hini nga moderno nga pamaagi yana nga panahon han pandemic.
Buwas nga adlaw, Hunyo 12, pormal nga iglalansad han syudad an nasabi nga proyekto kun diin ngatanan nga Ormocanon ug bisan hin-o nga masulod han syudad in kinahanglan kumuha hin Quick Response (QR) Code. Dida hini nga QR Code igbubutang an ngaran, address, edad, contact details, civil status ngan gender han usa nga tawo.
Ini nga QR Code in gagamiton o igpe-presentar kun masulod ha Ormoc ug mapakadto ha pampubliko ngan pribado nga mga establisemento. Pinaagi hini mas magigin masayon an pag-trace o pagtudlok han mga lugar ngan iginka-urusa nga mga tawo han matatapnan han virus.
Sumala pa han Executive Order 64 ni Mayor Richard Gomez, puede maka-rehistro para makakuha han QR Code dida ha www.safeormoc.today. Gagamiton la an smartphone han pagparehistro.
Kun waray smartphone, puede pumakadto ha Information and Technology Department ha City Hall an magpapa-rehistro. Kun tapos na mag-rehistro, an mga impormasyon han tawo in masulod na ha database. Iginpatapod han City Government nga waray makakakita han mga impormasyon labot la kan Mayor Gomez, City Health Officer ngan City Police Chief. Kinahanglan gihapon nga may pagtugot an nadadabi nga tawo antis pa man kita-on an iya personal information.
Kasumpay hini, mahugot an panawagan han City Government nga deri pag-intremisan o pagmulayan an pagkuha han QR Code ha internet. An mga maghihimo hin tinuyaw dida han Mobile App in maatubang hin penalidad.
An mga personales han City Government in magsusudoy ha mga barangay ngan establisemento basi igpasabot an proseso hini nga teknolohiya. # (KEVIN SIOSANA)
