Isumat.com/4:25PM, June 11, 2020

Mahugot nga ginkondenar han LGU-Tolosa, Leyte an terorismo nga mga aktibidadis. An munisipalidad ha panguna ni Mayor Maria Ofelia Alcantara in nagdig-on nga deri matugot an mga Tolosanos hin bisan hin-o nga maghihimo hin kasamok ha ira lugar.

Ini an nagin reaksyon han bungto tungod han ka-aresto hin duha nga gin-aalegar nga miembro han rebelde nga New Peoples’ Army ha Brgy Burak hadin Hunyo 8. Nagpahayag an LGU nga waray hira salabutan nga pira na ka bulan nga nag-uukoy an nasabi nga mga suspetsado didto han barangay nga sakop han bungto.

Sumala han opisyal nga pahayag han LGU, an Tolosa in lugar hin kamurayaw ngan abri an ira bungto ha bisan hin-o nga karuyag makig-urusa han mahimyang nga kahimtang han munsipalidad.

Kasumpay hini, ginseguro han LGU nga ira ginpahuruhugot an seguridad basi masupil dayon kun mayda man magpupruweba paghimo hin deri maupay ha ira bungto. Iginpatapod ni Alcantara nga kontrolado han mga otoridad an sitwasyon ngan waray angay ikabaraka an mga mulopyo. Iya gin-aghat an katawhan nga magin mabinantayanon basi mapukan dayon an mga nagpaplano hin pagsamok.

Dara hadto nga panhitabo, na-alarma an LGU ngan kadagmitan naghimo hin mga pitad basi deri na matabo utro an insidente.

Hadin Hunyo 8 han gab-i, na-aresto han mga tinubyanan han balaud hira Alma Gabin ug an iya live-in partner ngahi Alden Dagohoy. Hi Gabin in naatubang hin kaso nga pagpatay ha Northern Samar. Hira ngaduha in gin-aaligar nga mga lider han rebelde nga kagi-usan ha Northern Samar. Nakumpiskar tikang kan Dagohoy in kalibre 45 nga pistola ngan mga bala.

Nahisumat nga tikang pa han Disyembre 2019 nag-ukoy didto han barangay ini nga mga suspetsado ngan nakakarawat pa han SAP cash assistance tikang han gobyerno. # (KEVIN SIOSANA)