An pamilya Samante, tikang ha wala : Fred Lawrence, Florence Ingred, Freddy ngan Loriebel. (Photo courtesy by Loriebel D. Samante)

Isumat.com/8:45AM, Pebrero 9, 2021

Utro nga napamatud-an nga deri maka-urulang ha pagkab-ot hin onor ngan hitaas nga kina-adman an lugar nga gintubu-an ug an pag-eskwela ha pampubliko nga eskwelahan.

Hi Fred Lawrence Delantar Samante, taga Brgy Rawis Poblacion, Leyte, Leyte amo an nagin Numero 1 dida han mga nagpakapasar han Medical Technology Licensure Examination nga gindumara han Enero 2021. Hiya in naka-angkon hin grado nga 91.40% basi manguna ha Top Ten Passers.

Hi Samante in nag-eskwela han elementarya ha Leyte Central School kun diin hiya an Class Salutatorian ug han sekondarya ha Leyte Agro-Industrial School komo Valedictorian. Ini nga mga eskwelahan in didto han iya bungto nga natawhan ngan gintubu-an. Nagtapos naman hiya han kolehiyo ha St Scholastica’s College-Tacloban kun diin hiya in Academic Scholar.

An 21-anyos nga board top-notcher in anak nira Freddy Samante, barangay captain han Talisay, Capoocan, Leyte ngan hi Loriebel Delantar-Samante, an nagungulo han Dep-Ed Leyte 1 District. Mayda niya bugto nga babaye, hi Florence Ingred.

Dida han interview han Isumat.com, iginpahayag ni Maam Loriebel nga an hingyap han iya anak in magin usa nga doktor, sanglit katapos han pagpasar han MT Board Exam, ma-eskwela hi Fred Lawrence han kurso nga Medicine.

Iginbuyagyag gihapon ni Mrs Samante nga waray ha ira hunahuna nga mangunguna an anak han eksaminasyon, kay an ira la igin-ampo an pakapasar, pero sobra pa an iginhatag han Makagarahum ha ira. “God has blessed us more than what we prayed for. He has greatly blessed us,” pahayag pa han nanay ni Fred Lawrence.

Tim-os gihapon nga ginpapasalamatan han pamilya Samante an mga magturutdo ha Leyte Central School ngan LAIS han ira paglatag hin madig-on nga pundasyon han pag-eskwela ni Fred Lawrence. Iginpa-abot gihapon an pagpasalamat han pamilya ha nagdudumara han St Scholastica’s College labi na kanda Sister Mikee Manalang, Dr. Lim, Sir Clive Mercado upod na an faculty han kolehiyo.

An mensahe han iya kag-anak kan Fred Lawrence: ” Igpadayon an paningkamot nga makab-utan an imo mga inop ngan kami in pirmi masuporta ha imo. “

An bungto han Leyte, Leyte in namumutang 82 kilometros tikang ha Tacloban ngan sobra usa ka oras an biyahe tikang han nasabi nga syudad. Maagi-an an bungto kun tikadto an biyahe ha probinsya han Biliran. Ini in 4th Class Municipality, mayda 30 nga barangay ngan sobra 40 Mil an popolasyon subay han 2015 Census. #

Kasumpay hini, igindadasig han St Scholastica’s College an performance han eskwelahan dida han board examination. Dara ini kay an top-notcher ira estudyante, ngan dida han unom nga first-time takers , lima an nakapasar (83%). Dida naman han duha nga re-takers, usa an nakapasar (50%). An Over-all passing percentage han eskwelahan in 75%, samtang an National Passing Percentage 67%. #