Isumat.com/7:29AM, Pebrero 10, 2021
Bastante an suplay han isda ha Sinirangan Bisayas pero an makabibido kay mahal an presyo, sumala kan Norberto Berida, Regional Director han Bureau of Fisheries and Aquatic Resources (BFAR).
Ha interview han iFM-RMN Tacloban, iginbuyagyag ni Berida nga waray problema kun suplay han isda an pag-iistoryahan kay nakakahimo pa ngani kita pagpadara hin isda ngadto ha iba nga lugar sugad han General Santos City. An makuri la hini, mahal an presyo ha mga merkado denhi ha aton dapit tungod han nagsasapin-sapin nga mga kamot nga inaagi-an han produkto antis ini mahidangat ha mga merkado.
Nagsering an opisyal nga porlomenos lima nga balitang an aagi-an han isda antis ini igbaligya ha merkado. Syahan an mangirisda, pag-abot ha pantalan mayda matapo nga postor, kataliwan hini igbabaligya han postor ngadto han mga fish dealer nga magbibiyahe han isda ngadto ha fish port o bagsakan, ngan didto ha fish port ibabaligya ha mga magtirinda ha merkado ngan igpapasa na ha publiko.
Hinungdan hini, tikang han presyo han mangirisda, nadodoble an presyo o nasobra pa ngani pag-abot ha consumers, pahayag pa ni Berida.
Iya naman igindugang nga barubarato an mga “Cultured” nga produkto sugad han bangus ngan tilapya kay aada man ha fishpond ngan fishcage kay kontrolado ini han ahensya. An problema an presyo han isda tikang ha kadagatan. Ginklaro ni Berida nga an manginginlabot unta han presyo hini amo an mga LGUs ngan Department of Trade and Industry.
Posible gihapon nga nakakaduso tipa-igbaw han presyo han isda amo an pagkaada hin African Swine Flu ha aton rehiyon, sumala kan Berida. Ini in tungod kay magtitikadamo an mapalit hin isda kay magkukulang man an suplay han baboy ug an iba nga katawhan deri mapalit han baboy ha kabaraka nga magsarang an ASF. #
