Isumat.com/7:16AM, September 03, 2020
Iginpatapod ni WBO Bantamwight king mJohn Riel Casimero nga deri ma-agaw an iya korona dida han iya pakig-atbang kan Duke Micah han Ghana hiton ti-arabot nga Setyembre 27 ha Estados Unidos.
An kampeon nga taga Ormoc City in kumpiyansa nga deri ma-obra ha iya an abilidad han challenger nga taga Ghana. Waray pa ngani hira mag-aasdangay mayda na plano yana hi Casimero han sunod niya nga tutumbahon ha ring.
Hi Casimero in may bitbit nga 29 nga daog, 20 hini pinaagi hin knockout, ngan upat nga perde. Ha luyo nga bahin, hi Micah in may record nga 24 nga daog, 19 pinaagi hin knockout ngan waray perde.
Aminado hi Micah nga makarit an Pinoy Champion, pero nasarig hiya han iya abilidad ngan hingpit nga pag-ensayo. Hinungdan hini, dako an iya paglaum nga peperdehon niya hi Casimero ngan dadad-on niya ha Ghana an titulo.
Nagpahayag an Ormocanon champion nga katapos niya dispatsaron hi Micah, posible hiya sumaka ha Super-Bantamweight Division basi atubangon hi Luis Nery han Mexico nga nagin kampeon hanhadi. Deri gihapon nawawad-an hin paglaum hi Casimero nga madadayon an ira kumbati ni Japanese World Champion Naoya Inoue.
Kun manunumduman, magkakapanta na unta hira Casimero ngan Inoue hadin Abril pero nakanselar ini tungod han Covid Pandemic. Tikang hadto nawarayan na interes an Hapones ngan an iya aatubangon an Australyano nga hi Jeff Maloney dida hiton Uktubre.
Nagsering hi Casimero nga nahadlok ha iya hi Inoue, pero naglalaum hiya nga magbabaga-o an desisyon han Hapones ngan madadayon an ira balyu-ay hin kamaoo.
