Isumat.com/7:16AM, August 10, 2020
Waray natatabo nga tinuyaw ha mga transaksyon han Philhealth denhi ha Eastern Visayas sumala han tagpamulong han ahensya denhi ha rehiyon Marimar Zabala.
Ini an nagin kabatunan ni Zabala han iginpipilak nga mga akusasyon hin korapsyon kontra han opisina nga nagdalan hin imbestigasyon ha senado kun diin binilyon-bilyon ka pesos hin pondo an gin-aalegar nga nawara dara hin pakigkuntsaba hin pira nga opisyal han ahensya ngadto hin mga hospital.
Mahugot nga igindiwara ni Zabala ini nga mga akusasyon ngan iya igindig-on nga limpyo an ngatanan nga transaksyon denhi ha Region 8 ngan ma-ol-ol para ha ira mga empleyado nga sugad hini an natatabo kay matadong ngan tangkod an ira pagserbisyo.
Aminado hi Zabala nga apektado hira hini nga iristoryahon yana labi na an mga notisya ha Metro Manila nga dako nga salapi an nakawang tungod hin mga transaksyon nga napuputos daw hin anomaliya.
Iginsumat gihapon ni Zabala nga an Philhealth-Region 8 in nagdugang hin mga personales nga manginginano han mga transaksyon ha mga hospital ngan dialysis centers.
Han una nga semana, igin notisya han peryodiko nga Philippine Daily Inquirer nga an mga State Auditors ha Philhealth-Central Office in nagpahayag nga may mga hospital nga deri angay katagan han Advance Payment para han COVID Financial Package tungod kay waray akreditasyon ha Philhealth ngan mayda gin-aatubang nga kaso administratibo. Usa han ginngaranan nga hospital amo an Catarman Doctors Hospital.
Ginklaro naman ni Philhealth President Ricardo Morales nga angay tagan an hospital han pondo kay kumpleto an requirements ngan mayda man lisensya nga mag-operate tikang ha Department of Health. Igindugang pa ni Morales nga kinahanglan han mga hospital an pondo kay aada an posibilidad nga magtikadamo pa an pasyente han COVID-19 sanglit angay la nga pirmi andam an mga hospital.
Yana nga semana, igpapadayon han senado an imbestigasyon kasumpay hini nga gin-aalegar nga eskandalo ha Philhealth. #
