(image by candymag.com)

Basta gud man waray mga libang dara hit kamaluntog pag-istambay, nakakahimo in pira nga mulopyo hin mga butang nga usahay kalipayan ngan kali-awan an panuyo-anan pero nagreresulta hin deri maupay nga palabay-labay hin mga pamulong nga puede makaguba o makaraot hin integridad hin mga tawo ngan mga institusyon.

Ini an rason kun kay-ano nga naghimo na yana hin pitad an Criminal Investigation and Detection Group han PNP (CIDG) denhi ha Region 8 basi mabisto ngan magkadadakop an mga tawo nga nagpapaluyo hini nga tinatawag nga “trashtalkan” ha social media. An CIDG in makikigsumpayan ha PNP Cybercrime Unit basi imbestigaran an mga grupo nga responsable hini nga aktibidadis ha social media.

Nagpahayag hi PMajor Duane Francis Ducducan han CIDG nga ini in puede makaghatag hin deri sakto nga impormasyon ha publiko ngan deri ini angay magsarang pa labi na yana nga panahon nga namemeligro an katawhan dara han COVID-19.

Dida gud man hini nga trashtalkan, magkakaada hin duha nga grupo kun diin magpapabarubalyo hin mga singgit, sunlog, pakaraot, pagtamay, ngan waray hangkag nga mga pulong an mga miembro hini. Kun kali-awan la an panuyo, waray gad problema pero waray makakapugong han bisan hin-o nga miembro nga magpahayag han iya bootsidngon. Ug an maraot hini, kay iton iba nabibigit ngan nahahangit na sanglit waray na kontrol ha emosyon nga nagpapagawas han iya opinyon nga posible magdurot hin karat-an ha iba.

Subay han panginano han isumat.com, mayda mga impormasyon nga nalalakip dida hini nga trashtalkan groups an Leyte versus Samar, ug an EVSU versus LNU. Kasumpay hini, nagpagawas na hin opisyal nga pahayag an Eastern Visayas State University pinaagi han Student Publication Office nagsasagdon ha ira mga estudyante nga deri umapi hini nga aktibidad ha social media.

Sumala han Editorial Board han The Industrial Wheel han EVSU, nakadangat na ha administrasyon han unibersidad ini nga notisya ngan bisan an presidente han eskwelahan an ginhimo-an hin dummy account salit sugad sugad nga nagawas an iya ngaran dida han palabay-labay hin pulong. Nag-warning an unibersidad nga maghihimo hira hin kaangayan nga aksyon nga puede umabot ha legal nga pitad kontra han mga tawo nga nagbubuhat hini.

Nagsering an CIDG nga an mga grupo o tawo nga responsable hini in maatubang hin kaso nga pagtalapas han Republica Acta 10591 Article 154, section 18 – ” Unlawful use of means of publication and unlawful utterances and penalties to be imposed on a person who will publish false news.”

Iginlalarang han balaud an sirot nga maabot hin unom ka bulan nga kapresuhan ngan multa tikang 40 mil tobton 200 mil pesos kontra han mapapamatud-an nga nakasupak hini nga balaud. #

(Posted 2:48 PM, April 1, 2020)