(image by wikipedia)

     Ginpahuruhugtan pa an kwarentina para han mga mulopyo han Tarangnan, Samar. Dida han iginapalusad nga Executive Order ni Mayor Arnel Tan, an bug-os nga munisipalidad an iginpailaum na ha Enhanced Community Quarantine.

     In inga pitad han alkalde amo in dara kay empleyado ha hospital han Tarangnan an ikaduha nga tawo ha Region 8 nga nag positibo han COVID-19. An 63-anyos nga lalaki in nag-uukoy ha Calbayog City pero na-report ha Tarangnan Hospital para han iya trabaho. An pasyente in naka confine na yana ha Eastern Visayas Regional Medical Center (Magsaysay-Tacloban).

     Lakip dida han kamanduan amo an pag kwarentina hin katorse dias han mga tawo han mao nga bungto nga iginka-urusa o iginka-upod-upod han nasabi nga pasyente. Hinsabutan man gud nga pumakadto pa ini nga COVID-19 positive han iya trabaho antis hiya makumpirmar nga nagdadara han virus.

     Iginmando gihapon ni Mayor Tan nga waray bisan hin-o nga makakasulod o makakagawas han ira bungto labot la kun mga emergency ngan duro ka importante nga mga rason. An mga pag deliver hin pagkaon ngan mga produkto tikang ha iba nga lugar in bubuhaton nala ha boundary han bungto ngan Catbalogan basi waray makasulod nga iba nga tawo ha ira munisipalidad.

     Samtang, an Department of Health-Region 8 in mahugot nga nagpanhimuwa han mga istorya nga COVID-19 an rason han kamatay han bugto hini nga lalaki. Nagsering an DOH nga ugsa pa matapnan han virus ini nga lalaki, maiha na nga may sakit an iya bugto ngan deri an corona virus an hinungdan han iya kamatayon.  # 

(Posted 4:06 AM, April 2, 2020)