Gin-aaghat han Archdiocese of Palo an mga magtoloohon han Romano Katoliko nga Singbahan nga magin tim-os ha kasing-kasing an pagtigaman han Semana Santa bisan kun apektado an nabatasanan nga mga aktibidad.
Dida hin usa nga pahayag, nagsering hi Fr. Chris Militante, tagpamulong han Archdiocese, nga waray maka-urulang han aton pagpakita han pagtoo kan Hesukristo labi na yana nga naatubang kita hini nga krisis han corona virus. Sumala pa ha iya, bisan kun deri kita makakatambong han mga aktibidad ha singbahan, puede ini himoon ha aton tagsatagsa nga panimalay.
Buwas nga adlaw, Abril 5, amo na an pagtikang han Holy Week kun diin an buruhaton amo an Santos nga Misa ug an nabatasanan nga pag bendeta han lukay. Kasumpay hini, gin-aghat ni Militante an mga magtoloohon nga manmati ngan makig-urusa han mga misa nga igpapa-agi ha telebisyon ngan radyo. Iya gihapon iginpahinumdom nga kinahanglan an insakto nga pang-gios samtang natambong han misa bisan la didto ha balay. Kinahanglan naka sentro an huna-huna ngan kasing-kasing dida han liturhiya ngan waray iba nga ginhihimo durante han misa, pahayag pa ni Fr. Chris.
Nagsumat an Archdiocese nga an mga kapadi-an in maglilibot ha mga barangay dida hiton Palm Sunday ngan gin-aawhag an katawhan nga igbutang an ira mga lukay ha gawas han panimalay basi mabendetahan.
Pag-abot han Huebes Santo ngan Viernes Santo, igpapadayon gihapon an mga aktibidadis ha mga singbahan ngan puede makapartisipar an mga Katoliko pinaagi han live streaming ha telebisyon ngan iba pa nga media.
Amo gihapon an matatabo dida han Sabado de Gloria ug an Domingo han Pagkabanhaw, pero deri la anay bubuhaton an “Sugat” dara gud man han iginpapasunod nga mga health protocols yana nga mga takna.
An Archdiocese han Palo in nananawagan ha katawhan nga deri hingalimot ha pagdangop ha Makagarahum labi na ha panahon han krisis ngan ini nga Semana Santa in importante hin duro kay pinaagi hini aton gindudumdom an sakripisyo ngan paghatag han kinabuhi han Ginoo para han aton katalwasan. #
(Posted 9:07 AM, April 4, 2020)
