Isumat.com/9:41AM, December 14, 2020
Pira na nga mga nasud an nagtikang panmakuna han ira katawhan basi deri matapnan han ginkakahadlukan ngan makamaratay nga Covid-19 ug ini nga bakuna in pinaagi han pagtusok han injection o heringgilya ha butkon han tawo.
Ha atubangan hini nga kasagipo han magkalainlain nga gobyerno pagpalit han marahalon nga bakuna, mayda naman gin-iimbento yana nga Oral Vaccine o bakuna pinaagi han pagtumar, ug an nangunguna han grupo amo an Pilipino nga hi Fr Nicanor Austriaco, usa nga padi nga kaapi han Dominican Order. Hiya in eksperto gihapon ha seyensa labi na ha larangan han Molecular Biology.
Subay han artikulo nga sinurat han taga Rehiyon Otso nga Journalist Ronald Reyes ngan nahipublikar ha SunStar, hi Fr Austriaco in nagtitimpla hin bakuna nga posible pangontra han Covid. An makalilipay hini kay barato an bakuna sanglit dako an tsansa nga makakapalit hini an kablas nga mga nasud sugad han Pilipinas.
Hapagkayana, gamay pa an tsansa hini nga iya gindidiskubre pero iya bubuhaton an ngatanan labi na gud para han katalwasan han iya igkasi mga Pilipino, pahayag pa ni Austriaco. Plano niya nga kun deri madiskarel an iya paghimo, denhi ha Pilipinas an pag-testing hini ha mga kahayupan ngan kun magin epektibo, ngadto na ha tawo. An pagproseso hini in bubuhaton ha laboratoryo ha University of Santo Tomas (UST) ha Manila, sumala han artikulo ni Reyes nga personal nag-interview han Padi.
Iginsumat ni Austriaco nga an panguna nga elemento nga gagamiton han iya bakuna amo an Probiotic Yeast . An yeast in ginagamit nga pagpatubo han ginhuhurno nga tinapay. An maupay pa gud hini kay deri na kinahanglan pa hin freezer an Oral Vaccine nga iya ginmamalahimo.
Ginklaro han Padi nga medyo madugay an proseso han pagdiskubre hini nga bakuna, pero ha takna nga maseguro niya nga epektibo ini, kadagmitan mag-aaro hiya han permiso han gobyerno nga gamiton ini han tawo. Iya binansagan ini nga proyekto komo “Project Pag-asa.”
Antis hiya magin Padi, hi Fr Nick in nakagtapos han kurso nga BioEngineering, Summa Cum Laude, ha University of Pennsylvania. Naka-angkon hiya hin Doctorate in Biology ha University of Massachusets. Hadton 1997, nakasantop hiya han pagserbe ha Singbahan, sanglit umentra hiya han pagkapadi. Mayda gihapon niya Moral Theology Doctorate ha University of Fribourg ha Switzerland. Nagpapakita ini nga eksperto gihapon hiya ha relihiyon ngan moralidad.
Nagtukod hi Fr Nick han kalugaringon niya nga Austriaco Laboratory ha Providence College, USA, kun diin ira gintututukan an pag-istudyo han Genetics of Programmed Cell Death using Yeasts as Model Organisms.
An kag-anak ni Fr Nick in mga Pilipino nga mga inhenyero. Denhi hiya natawo ha Pilipinas pero nagtubo ha Thailand ngan Malaysia. Ha edad nga 16, nag-aram na hiya ha Amerika tungod han Full Scholarship nga iginhatag han University of Pennsylvania.
Para kan Fr Nick, usa hiya nga Padi, Biologist ngan Moral Theologian. Sumala ha iya, an siyensya an pag-istudyo han hinimo-an han Ginoo, sanglit tungod hini an iya ginhihimo yana amo an paggamit han siyensya ha pagpasalamat ngan pagdayaw han Makagarahum. #
,
